Майя Павлова: «Дьиэ кэргэнинэн уолбутугар ыалдьан, икки күн утуйбатыбыт…»

Майя Павлова: «Дьиэ кэргэнинэн уолбутугар ыалдьан, икки күн утуйбатыбыт…»

08.07.2024, 19:41
Хаартыска: М.Павлова тиксэриитэ.
Бөлөххө киир:

Бу күннэргэ Саха сирин олохтоохторун барыларын үөрүүлээх сурах кууста. Арассыыйа хомуур хамаандатын тустууга Лев Павлов Сербияҕа көҥүл тустууга Европа юниордарга чөмпүйүөнэ буолла.

Хаартыскаҕа: Павловтар уолаттара.

Лев Сунтаар улууһуттан төрүттээх, биэс оҕолоох улахан дьиэ кэргэн улахан уола. Дьиэ кэргэн, таптал, бэриниилээх буолуу күнүгэр кини ийэтэ Майя Афанасьевнаны кытта кэпсэттибит.

Уолбутугар ыалдьан, икки күнү быһа утуйбатыбыт да диэххэ сөп. Дьиҥнээхтии сүрэҕим ыалдьыар диэри наһаа долгуйабын, ол да буоллар, хайаан да көрөбүн. Хайдах эрэ, санаабар, көрбөтөхпүнэ, хотторон хаалыах айылаах, наһаа долгутуулаах… Улахан күрэхтэһиилэргэ, оҕобун алҕаан, хайаан да эрдэттэн алаадьылыыбын. 

Бары дьиэ кэргэнинэн олорон көрдүбүт, уолбутугар «ыарыйдыбыт». Дьиэ иһигэр ыһыы-хаһыы, «һуу-һаа» бөҕөтө. Биир уолбут убайа ойуулаах футболкатын кэтэн баран сылдьар, устар аат суох. Онтон, дьэ, киһи тылынан кэпсээбэт үөрүүтэ! Олу-ус элбэх эҕэрдэ кэлбитэ. Мин үөрбүт сирэйдээх утуйбутум, ол курдук ымайбытынан, уһуктан кэлбитим. Соннук ымайан баран, сылдьабын, — диэн үөрүүтүн үллэһиннэ.

Павловтар бастаан Мииринэй Арыылааҕар олорбуттара, онтон Сунтаарга көһөн кэлбиттэрэ. Лев бастакы тириэньэрэ — аҕата Семен Андреевич этэ. Семен Андреевич Павлов — хапсаҕайга СӨ спордун маастара, көҥүл тустууга Арассыыйа спордун маастара. Улуустааҕы спорт отделыгар начаалынньыктаабыта.

Билигин кэскиллээх спортсмены тириэньэрдэр Николай Данилов, Герман Контоев дьарыктыыллар. Уол үксүгэр дойдутугар, Сунтаарга дьарыктанар, онтон Дьокуускайга баран, эрчиллэр, хомуурдарга сылдьар.

Кини бырааттара эмиэ тустуунан дьарыктаналлар, баҕар, убайдарын туйаҕын хатаран, эмиэ биллэр спортсменнар буолан тахсыахтара. Хайа, убайдарын тыыннаах холобурун, хайдах дьарыктанарын, сүбэтин көрө-истэ сылдьар буоллахтара дии.

Ийэлэрэ Усуйаанаттан, аҕалара Сунтаар Кириэстээҕиттэн төрүттээхтэр. Оҕолорун үлэҕэ уонна спорка, чөл олоххо сыһыаран иитэллэр. Сайын аайы эбэлээх-эһэлэригэр баран, оттоһоллор.

Бырааһынньыктарга, төрөөбүт күннэргэ минньигэс ас астанан, остуол тула бары мустан, истиҥник кэпсэтэ-кэпсэтэ, аһыырбытын сөбүлүүбүт. Айылҕаҕа сынньанарбытын туохха да биэрбэппит. Уолаттар бары спордунан дьарыктаналлар, кыыс үҥкүүгэ сылдьар. Оҕолор бары бириэмэни халтайга ыыппакка, дьарыктаах буолалларыгар төрөппүттэр кыһаллабыт. Онон уолаттар сайыннары дьарыктаналлар, бу буолаары турар өрөспүүбүлүкэтээҕи улахан күрэхтэһиилэргэ бэлэмнэнэ сылдьаллар.

Онон биһиги дьиэ кэргэҥҥэ кэлии-барыы, күрэхтэһии элбэх. Лева кыра эрдэҕиттэн элбэх күрэхтэһиилэргэ кыттар этэ, хотторуу да ханна барыай? Спордунан дьарыктанар оҕоҕо аҥаардас эрчиллии эрэ тиийбэт эбит, элбэхтик күрэхтэһиилэргэ сылдьан, уопутуруон наада диэн түмүккэ кэллибит. 

Лева холку, наһаа аһыныгас майгылаах. Бырааттарын, балтын атаахтатар аҕай, куруук кэһиилээх буолар. Дьарыгар наһаа эппиэтинэстээхтик сыһыаннаһар, дьиссипилиинэни кытаанахтык тутуһар, биир да мүнүүтэ хойутаабат. Урут өрөбүл сарсыарда спортсааланы тоҥсуйан, хатыылаах ааны арыйтаран, дьарыктана барар этэ. Кыра эрдэҕиттэн көҥүл тустуу, олимпийскай чөмпүйүөннэр тустарынан хасыһан ааҕара, билигин барыларын ааҕа билэр, үгүстэрин кумир оҥостор. Оҕо эрдэҕиттэн спорка наһаа бэриниилээх, Олимп диэки сыаллаах. 

Билигин саҥа саҕалаан эрдэҕэ, суола арылыннаҕа. Оҕобор эрэнэбин, ийэлии харыстыы саныыбын, — диэн Майя Афанасьевна кэпсээтэ.

Чахчыта да, оннук. Элбэҕи эрэннэрэр уолбутугар сахалыы сэмэйдик алгыс тылбытын аныыбыт! Европа чөмпүйүөннэрэ Лев Павлов уонна Андрей Мидловец от ыйын 10 күнүгэр Саха сиригэр көтөн кэлиэхтэрэ.

Ыспыраапка:

Лев Павлов — Арассыыйа юниордарга чөмпүйүөнэ, улахан дьоҥҥо Арассыыйа чөмпүйэнээтигэр үрүҥ көмүс призер, Арассыыйа спордун маастара, бэрэсидьиэн Владимир Путин талааннаах оҕолору өйүүр гранын стипендиата. Бу күрэхтэһиигэ норуоттар икки ардыларынааҕы кылаастаах спорт маастарын нуорматын толордо.

+1
60
+1
0
+1
0
+1
0
+1
0
+1
3
+1
5
Бары сонуннар
Салгыы
23 июля
  • 28°C
  • Ощущается: 28°Влажность: 42% Скорость ветра: 4 м/с

Сообщить об опечатке

Текст, который будет отправлен нашим редакторам: