Максим Андреев: “Туймаада” олимпиада – Арассыыйа, аан дойду үрдүк үөрэхтэригэр үөрэнэргэ “трамплин”

Бэрт сотору кэминэн СӨ Билим дьоҕус академиятыгар математикаҕа, физикаҕа, информатикаҕа, химияҕа “Туймаада” норуоттар икки ардыларынааҕы XXX үбүлүөйдээх олимпиада саҕаланаары турар. Быйыл Саха сириттэн уонна Арассыыйа эрэгийиэннэриттэн эрэ буолбакка, тас дойдулартан эмиэ 100-тэн тахса үөрэнээччи кыттыаҕа.

“Туймаада” олимпиада үөрэнээччигэ туох туһалааҕын туһунан Дьокуускай куорат 5-с нүөмэрдээх оскуолатын иитиллээччитэ, М.К. Аммосов аатынан ХИФУ үөрэтэр-билим киинин лиссиэйин бүтэрбит, билигин М.В. Ломоносов аатынан Москватааҕы судаарыстыбаннай университет механикаҕа-математикаҕа бакылтыатын бэһис кууруһун устудьуона Максим Андреев кэпсиир. Билигин кини математика олимпиадатын дьүүллүүр сүбэтин чилиэнэ, СӨ  математикаҕа сүүмэрдэммит хамаандатын тириэньэрэ.

Максим оскуолаҕа үөрэнэр сылларыгар “Туймаада” олимпиадаҕа хас да төгүл кыттыбытын этэр уонна бастаан 3-с истиэпэннээх дьупулуомунан наҕаарадаламмыт, онтон 2016-2018 сс. муҥутуур кыайыылааҕынан буолбут.

“Туймаада”, биһиги өрөспүүбүлүкэбитигэр үөрэнээччилэргэ анаан ыытыллар норуоттар икки ардыларынааҕы олимпиадалартан биир улаханнара. Дириҥ устуоруйалаах, сыллата араас дойду туочунай билиминэн умсугуйар саамай өйдөөх, талааннаах үөрэнээччилэрин түмэр. Биһиги өрөспүүбүлүкэбитигэр олимпиадаҕа кэлэр оҕолор өйдөөх садаачалары суоттаан, билиилэрин тургутан көрөр эрэ кыах бэриллибэт, ону таһынан, биһиги норуоппут култууратын, тылын уонна олоҕун-дьаһаҕын кытта билсэр кыахтаахтар”, — диэн Максим бэлиэтиир.

Өссө оскуола саҕаттан математиканан үлүһүйэр киһи быһыытынан, бу курдук үрдүк таһымнаах олимпиадаҕа кыттыытын тугунан да кэмнэммэт уопута, кини идэтин сөпкө таларыгар, чопчу ханнык үөрдүк үөрэххэ киирэригэр уонна билим “сарыыссатынан” ааттаммыт математиканы  олоҕун тухары сөбүлүүргэ сирдээбитигэр бигэ эрэллээх.

“Олимпиада кэмигэр култуура араас тэрээһиннэрэ ыытыллаллара, көрсүһүү киэһэлэригэр кыттарбыт, бэйэбит култуурабыт туһунан билиһиннэрэрбит, бэйэ-бэйэбитигэр норуоппут үгэстэрин кэпсиирбит, элбэхтик кэпсэтэрбит. Итиэннэ саамай сүрүнэ туочунай билимҥэ дьоһуннаахтык сыһыаннаһан,  Арассыыйа, тас дойдулар үрдүк үөрэхтэригэр киирэргэ тирэх уурар. Ол иһин “Туймаада” билиҥҥи кыттааччыларыгар туохтан даҕаны куттанымаҥ, аһаҕас, доҕордуу, эйэҕэс буолуҥ, маннык үрдүк таһымнаах үөрэх уонна билим тэрээһиниттэн доуһуйууну ылыҥ диэм этэ”, — диэн сэһэргэһээччим санаатын үллэстэр.

Санатан эттэххэ, ССРС норуотун учуутала М.А. Алексеев аатынан “Туймаада” норуоттар икки ардыларынааҕы үөрэнээччилэр математикаҕа, физикаҕа, химияҕа, информатикаҕа быйылгы олимпиадалара от ыйын 2-10 күннэригэр Саха сиригэр ыытыллыаҕа. Икки көрүҥүнэн буолуоҕа: олоҕурбут уонна тэйиччиттэн. Олимпиада иитинэн оҕолор айар киэһэлэргэ кыттыахтара, лиэксийэлэри истиэхтэрэ, өрөспүүбүлүкэбит кэрэ-бэлиэ сирдэринэн экскурсияҕа сылдьыахтара.

Дьүүллүүр сүбэ састаабыгар уонна мэтэдиичэскэй хамыыһыйаҕа Myongji (Корея Өрөсп.) университетын, Корея биологияҕа уонна биотехнологияҕа билимин билим-чинчийэр институтун, Москватааҕы физика-тиэхиньикэ институтун,  Москва, Санкт-Петербург, Ярославскай, Хотугулуу-Илиҥҥи университеттарын преподавателлэрэ, устудьуоннара, Федеральнай чинчийэр институт (РНА СС ССБК) билимҥэ үлэһиттэрэ киириэхтэрэ. Ону тэҥэ, дьүүллүүр сүбэ састаабыгар үгэс быһыытынан ааспыт олимпиадалар кыайыылаахтара, призердара киирдилэр.

СӨ Билим дьоҕус академията.