Малыкааннар хочуолунайга холбонору туруорустулар

Өлүөхүмэ улууһугар бырабыыталыстыба отчуота Өлүөнэ Эбэни кыйа сытар Малыкаан нэһилиэгиттэн саҕаланна.

2-с бөлөх салайааччыта, СӨ үпкэ миниистирин бастакы солбуйааччы Иван Алексеев 2022 сыллаах бырабыыталыстыба үлэтин туһунан кэпсээтэ.

Улууска былырыын 101 боппуруос турбут. Онтон 49 көрүллүбүт, 29 үөрэтиллэ сылдьар, 18 туолбут.

Малыкааҥҥа олохтоохтор сүрүннээн үс сүрүн боппуруоһу туруорустулар. Ол:

— нэһилиэги квартальнай хочуолунайга холбооһун. Социальнай суолталаах эбийиэктэр, ол иһигэр балыыһа, оһоҕунан оттуллаллар;

— хортуоппуйу харайар овощехранилище наада. Хаарыан хомуур сөптөөхтүк хараллыбакка ыскылаакка сытыйан-ымыйан хаалара хомолтолоох. Дьон үлэтэ сыаналаныахтаах;

— почтаны аҕалыы. Олохтоох почта бэйэтин кыаҕынан үлэлии сатыыр. Онон улуустааҕы почта хаһыаты, сурунаалы таһыыны тупсарыахтаах.

Малыкаан олохтоохторо отчуоттуур биригээдэ кинилэри быһа ааспакка кэлбитигэр, кыһалҕаларын истибитигэр махтаннылар.

Ааптар хаартыскаҕа түһэриилэрэ.