Мамаев кургаҥҥа Сталинграды көмүскээбит саха буойуттарыгар анаммыт бастакы обелиск аһылынна

Волгоград куоракка Мамаев кургаҥҥа «1942–1943 сс. Сталинграды көмүскээбит Саха сирин буойуттарыгар» анаммыт бастакы өйдөбүнньүк обелиск үөрүүлээх быһыыга-майгыга аһылынна.

Монумент Сталинград кыргыһыытыгар Кыһыл Аармыйа кэккэтигэр хорсуннук сэриилэспит саха буойуттарын чиэһигэр мемориальнай кылабыыһаҕа туруорулунна.

Бу Улуу Кыайыы 80 сылыгар саҕаламмыт «Кыайыы бастионнара» диэн историческай-патриотическай бырайыак чэрчитинэн аһыллыбыт бастакы өйдөбүнньүк бэлиэ буолар. Тэрээһиҥҥэ СӨ Ил Дархана Айсен Николаев уонна Волгоград уобалаһын губернаторын солбуйааччыта Геннадий Шевцов кыттыыны ыллылар.

Өйдөбүнньүк бэлиэни арыйыы иннинэ өрөспүүбүлүкэ дэлэгээссийэтэ Буойун Албан аатын саалатыгар, Сэбиэскэй Сойуус Маршала Василий Чуйков уҥуоҕар уонна Кыра бырааттыы уҥуохха сибэкки дьөрбөтүн уурдулар.

«Биһиэхэ, норуоппут улуу албан аатынан уруйдаммыт ытык сиргэ, Мамаев кургаҥҥа, өйдөбүнньүк бэлиэни – пааматынньыгы арыйар улахан чиэс уонна улахан эппиэтинэс. Бу – Сэбиэскэй Сойуус бары норуоттарын бэрэстэбиитэллэрин кытта бииргэ Сталинграды ньиэмэс-фашист сэриилэриттэн көмүскээбит биир дойдулаахтарбытыгар махталы биллэрэр бэлиэ. Көмүскээбиттэрэ, онтон чуолаан бу сиргэ фашист сэриилэрин үлтүрүппүттэрэ. Бу сиртэн Аҕа дойду Улуу сэриитигэр тосту уларыйыы саҕаламмыта, ол Сэбиэскэй Сойууска Улуу Кыайыыны аҕалбыта. Улуу Кыайыы 80 сылыгар олоххо киллэрэр «Кыайыы бастионнара» бырайыакпытын бу сиртэн саҕалыырбыт биһиэхэ ордук суолталаах этэ. Тоҕо диэтэххэ, биһиги Кыайыыбыт мантан саҕаламмыта. Манна биһиги дойдубут уонна киһи аймах бүтүн историятыгар номнуо киирбит сэбиэскэй буойуттар өттүлэриттэн хорсун санаа, эрэллээх буолуу уонна хорсун быһыы быһыылара көстүбүтэ», — диэн Ил Дархан бэлиэтээтэ.

Кини Волгоград уобалаһын салалтатыгар уонна олохтоохторугар охтубут буойуттар сырдык ааттарыгар харыстабыллаахтык сыһыаннаһалларын иһин махталын биллэрдэ. Сиһилии бу сигэнэн аах.