Маҥан аэропорда тигинэччи үлэлии турар

Саха сиригэр олохтоох аччыгый авиация олус наадалаах стратегическай суолталаах салгын тыраанспарынан буолар.

1997 сыллаахха бэс ыйын 16 күнүгэр Баатаҕай, Чокурдаах, Тиксии уонна Халыма-Индигиир авиационнай тэрилтэлэрин баазатыгар “Полярнай авиалиинийэлэр” ГУП тэриллибитэ.

“Маҥан» аэропордун производственнай баазатын бүгүҥҥү үлэтин-хамнаһын кытта билсээри “Полярнай авиалиинийэлэр” АУо (авиахампаанньа 2015 сылтан — акционернай уопсастыба) пресс-сулууспатын салайааччыта Станислав Платонов арыалдьыттаах Маҥан бөһүөлэгин туһаайыытын тутустум. Соругум – Үлэ сылынан сибээстээн аэропорт производственнай баазатын күннээҕи түбүгүн сырдатыы.

Кэпсэтиибитин тэрилтэ салайааччыта Юрий Мухаметов маннык саҕалаата:

“Полярнай авиалиинийэлэр” авиахампаанньа генеральнай дириэктэрин бирикээһинэн 2003 сыллаахха балаҕан ыйын 22 күнүгэр Маҥан аэропордун баазатыгар “Маҥаннааҕы производственнай комплекс” тэрилтэ тэриллибитэ. Производственнай бааза дириэктэринэн Юрий Мухаметов анаммыт. Ити кэмтэн ыла лоп-курдук 20 сыл ааста. Онон соторутааҕыта тэрилтэ үлэһиттэрэ үбүлүөйдээн олороллор.

Ити сыл саҥа анаммыт салайааччы бастакы тиэхиньиктэри кытта, биирдии АН-2 уонна МИ-8 көтөр ааллардаах үлэтин саҕалаабыта. Итинник тиэхиньикэлээх ханна ыраах көтүөҥүй, сүрүннээн Катастрофа мэдиссиинэтин киинин суукканы эргиччи үлэтин хааччыйаары дьуһуурунайдыыр этилэр.

Билигин Маҥан аэропорда киһи билбэт гына тупсубут, кэҥээбит, материальнай баазата бөҕөргөөбүт.

— Бүгүҥҥү күҥҥэ 30-тан тахса көтөр ааллаахпыт. Тэрилтэбитигэр 300-тэн тахса араас анал идэлээх исписэлиис үлэлиир. Саҥа кэлэ турар көтөр аалы туруорар да миэстэ тиийимиэх курдук буолла. Араас хайысханан сөмөлүөттэрбитин, бөртөлүөттэрбитин саҥарда турабыт. Холобур, РФ Доруобуйа харыстабылын министиэристибэтэ лиизининэн биэс бөртөлүөтү анаабыта, — диэн бэлиэтиир Юрий Мухаметов.

Салайааччыны кытта кэпсэтэн баран, аны көтөр ааллар турар былаһааккаларыгар киирдибит.

Күммүт чаҕылыйан, анаан көрөн биэрдэ. Онон хаартыскаҕа түһэрэргэ бэртээхэй кэм үүммүт.

Сөмөлүөт, бөртөлүөт элбэҕэ – бу түгэҥҥэ хайдах эрэ сэбиэскэй кэмҥэ төннүбүт курдук сананан ыллым.

“Билигин Ньурбаҕа санрейскэ көтөөрү турар бөртөлүөккэ баран, лүөччүгү кытта кэпсэтиэх. Быраастары күүтэн тураллар”, — диэт, миигин арыаллыы сылдьар Станилав Платонов кытыыга турар бөртөлүөккэ илтэ.

Лүөччүктэр бөртөлүөттэрин көтүүгэ бэлэмнии сылдьаллар эбит.

Сунтаартан төрүттээх уопуттаах лүөччүк Григорий Иванов  А.В. Ляпидевскай аатынан гражданскай авиация  Омскайдааҕы көтөр-тиэхиньиичэскэй кэллиэһин бүтэрэн, үлэлээбитэ 11 сыл буолбут.  Ми-8 бөртөлүөт хамандыыра Ньурбаҕа санэриэйси толорор бөртөлүөтү салайан көтүтээри турар эбит. Кинини атын хамандыыр солбуйуохтаах. Григорий Ивановтуун кэпсэтии маннык буолла:

Аны сөмөлүөттэри өрөмүөннүүр ангаарга киирэбит. Биһиги сылдьар кэммитигэр АН-3 сөмөлүөтү тиэхиньиктэр кыһыҥҥы көтүүгэ бэлэмнии сылдьаллара.

Өрөмүөннүүр сыах салайааччыта Павел Кашин бэлиэтээбитинэн, бу ангаарга Л-410, АН-2, АН-3, “Пилатус” сөмөлүөттэри тэҥэ, бөртөлүөттэр киирэн кыһыҥҥыга бэлэмнэнэн, өрөмүөннэнэн тахсаллар эбит.

— Манна өр буолбаттар, икки-үс күнүнэн бэрэбиэркэни ааһаат, атыттарга миэстэни босхолоон биэрэллэр. Бу Муомаҕа, Үрүҥ Хайаҕа көтөр АН-3 кыһыҥҥы “таҥаһын кэтэ” турар, — диэн кэпсиир Павел Владимирович.

… Ити курдук, кылгас кэм иһигэр тигинэччи үлэлии турар интернациональнай кэлэктииптээх стратегическай суолталаах тэрилтэҕэ сылдьан, санаалыын көнньүөрэн кэллим.

Сиһилии бу тэрилтэ туһунан репортааһы «Саха сирэ» хаһыат чэппиэрдээҕи нүөмэригэр ааҕыҥ.