“Маҥан борохуот” драма прокакка таҕыста

Бэс ыйын 19 күнүгэр Дьокуускай куорат бары киинэ тыйаатырдарыгар уонна улуустарга баар “Экстра Синема” хампаанньа киинэ тыйаатырдарын ситимигэр режиссер Инга Шепелева “Маҥан борохуот” мистическай драматын көрдөрүү саҕаланна.

Киинэни режиссер 2021 сыллаахха суруйбут сэһэнинэн Дьокуускайга, Кангаласка, Сыырдаахха, Жатайга устубуттар.

Киинэҕэ Москва чиновнига уонна учуутал дьахтар, олох атын-атын олохтоох соҕотох дьон көрсүһүүлэрэ, бастаан өйдөспөт буолуулара, онтон тугу барытын утаран туран соһуччу тапталлара кэпсэнэр.

Сүрүн оруолларга урут хаһан да киинэҕэ уһулла илик Элла Соколова – Дьокуускайдааҕы музыкальнай колледж преподавателэ уонна Санкт-Петербурдааҕы «Lusores», «Театр Поколений» уонна Литейнайга баар тыйаатырдар актердара Александр Кошкидько оонньоотулар.

Киинэҕэ маны тэҥэ Дьокуускай куорат музыкальнай оскуолаларын преподавателлэрэ, үөрэнээччилэрэ, үлэһиттэрэ уһулуннулар.

“Маҥан борохуот” хас да бэстибээлгэ ситиһиилээхтик кыттыбыт: “Зеленый экран” куонкуруска гран-прины ылбыт, “Маяк” бэстибээлгэ уонна “Сан-Паулуга буолбут аан дойдутааҕы бэстибээл кыттыылаахтара, Чебоксарытааҕы киинэ бэстибээлигэр дьүүллүүр сүбэ анал бирииһин уонна операторскай үлэҕэ бирииһи ылбыт.

Киинэ хос продюсердарынан биллиилээх режиссердар Степан Бурнашев уонна Дмитрий Давыдов буолаллар. 15 киинэни ситиһиилээхтик устубут эпэрээтэр Вероника Соловьева устубут.

Киинэ премьерата Москваҕа, Санкт-Петербурга, Екатеринбурга, Новосибирскайга, Краснодарга, Красноярскайга, Иркутскайга, Омскайга, Самараҕа уонна Новгородка буолуоҕа.

Яна Байгожаева.