Маҥан халааттаах аанньалларбар махталым муҥура суох

Бу күннэргэ ыарыым тииһигэ киирэн, хаан анаалыстарын, ол иһигэр, хас да көрүҥнээх УЗИ-ны ааһан,  дьэ бүтэн, М.Е.Николаев аатынан Мэдиссиинэ национальнай киинин-Өрөспүүбүлүкэтээҕи 14 нүөмэрдээх балыыһа  хирургия иккис отделениетыгар   эпэрээссийэлэнэн, сүрүн сыалбын-сорукпун ситиһэн, этэҥҥэ  буоллум.

Аны санаатахха, Мэдиссиинэ киинэ  “иккис дойдум” да курдук буолбут эбит. Бастаан 1995 сыллаахха  үөһүм тааһын ылларбытым. Оччолорго сэбиэдиссэй Петров диэн этэ, бэйэтэ эппэрээсийэлээбитэ. Онтон  2010 иккис ис  тэһэҕэспэр (грыжабар) кэлбитим. Сэбиэдиссэйинэн үрдүк категориялаах хирург, Саха Өрөспүүбүлүкэтин үтүөлээх бырааһа Слепцов Константин Николаевич үлэлиирэ. Кини соторутааҕыта уурайыар  диэри  төһөлөөх элбэх  эпэрээссийэни оҥорбута, төһөлөөх киһи олоҕун быыһаабыта, үтүмэн элбэх үгүс үлэни үлэлээбитэ буолуой? Онтон эстэпиэтэни эдэр эрчимнээх, үрдүк категориялаах хирург-быраас Холтосунов Иван Афанасьевичка туттарбыт.

Бу үһүс ис тэһэҕэспэр улаханнык ыксаан, мэһэйдэтэн кэллэҕим. Бу иннинэ, 2-3 сыллааҕыта ыалдьан, көрдөрүнэ сатаан баран сылайан, дойдубар төннүбүттээҕим..

Саатар олорор сирбит Өймөкөөн ырааҕа, суолбут-ииспит мэһэйэ-таһайа  кыһалҕаҕа кубулутар, ылбычча саастаах киһиэхэ ыарахаттардаах.  Урут Томторго кыра сөмөлүөт түһэрин тохтоппуттара икки хас сыл буолла.

Эмтиир бырааһым — үрдүк категориялаах хирург, мэдиссиинэ билимин хандьытаата, Саха Өрөспүүбүлүкэтин  үтүөлээх бырааһа Слепцов Валерий Дидимович үлэтигэр наһаа эппиэтинэстээх, ыарыһахха олус болҕомтолоох, сүбэ-ама биэрэ сылдьар. Кини сарсыарда эрдэттэн Варвара Алексеевна Петровалыын  куруук баар буолаллар, туруу үлэһиттэр, үгүс үөрүйэхтээх маҥан халааттаах аанньаллар.

Этэҥҥэ уустук эпэрээссийэни ааһаммын, туругум үчүгэй. Бырааһым барахсан  салгыы харыстанарбар сүбэ-соргу биэрэн,  алҕаан атаарда.

Эмиэ суол хаалаарын баттаһа айаммытыгар туруммуппут. Ол тухары кэргэним Прокопий Николаевич  мэлдьи көрөн-истэн, бүөбэйдээн илдьэ сырытта, киниэхэ махталым муҥура суох.  1982 сыллааххха суол саахалыгар түбэспитим кэнниттэн мэлдьи аттыбар баара олус үөрдэр, санаабын көтөҕөр буолан, эрэх-турах сананабын.

Мэдиссиинэ национальнай киинин  бастакы бэрэсидьиэммит Михаил Николаев 1990-с сылларга, ыһыллыы-тоҕуллуу  саҕана, олохтоохтук күүскэ туруорсуутун түмүгэр туттарбыт  сүдү өҥөлөөх. Махтал бэлиэтигэр  кини аатын үйэтиппиттэрэ махталлаах дьыала буолар.

Ону сэргэ, Дьокуускайга эбии Кардиология уонна Онкология  кииннэрэ тутуллубуттара киһи доруобуйатын туһугар болҕомто уурулларын, эмтэнээччигэ үтүө сыһыаны көрдөрөр.

Онуоха  дьон олоҕун быыһыыр тутаах сиринэн хирургия иккис нүөмэрдээх отделениета буолар. Төһөлөөх киһи ыраата барбакка,  үрдүттэн доруобуйатын  туругун көрдөрүнэн, санаата-оноото көнөн барбытын ааҕан сиппэккин. Кинилэртэн  биирдэстэрэ бу сурук ааптара буоллаҕым.  Отделение үлэһиттэрэ эйэҕэстэрэ, кыһамньылара — ыарыһаҕы түргэнник үтүөрдэр эмп кэриэтэ буоллахтара. Астара тотоойу, минньигэс, хас биирдии ыарыһахха диета-остуолунан түҥэтиэх диэтэххэ, ону кыайа туталларын сөҕөҕүн эрэ. Тутаах үлэһиттэр Маргарита Дмитриевна, Матрена Исаковна, Анна Николаевна  уо.д.а. эбээһинэстэрин олох чуолкайдык толорорго үөрэнэн да хаалбыттар диэхпин баҕарабын. Бу курдук бары бииргэ суулаһан, хотуулаахтык үлэлиир буолан, хирургия иккис отделениета бастыыр  иһин куоталаһыыга киирсэр эбит диэн үөрэбин  уонна инникитин да мэлдьи инники буолуохтара диэн эрэллээхпин.

Үрүҥ тыыммын өллөйдөөбүт маҥан халааттаах аанньалларбар Валерий Дидимович Слепцовка, Иван Афанасьевич Холтосуновка, анестезиолог Андрей Васильевич  Лугиновка ис сүрэхтэн этиллэр махтал тылларын аныыбын уонна үлэлэригэр өссө үрдүк үрдэллэри ылыахтара, уҕараабат үлэлэринэн Михаил Ефимович Николаев аатын өрүү үрдүккэ көтүтүөхтэрэ диэн баҕа санаабыт тириэрдэбин.

Валентина КСЕНОФОНТОВА, 75 саастаах, педагогическай үлэ бэтэрээнэ, иккис группалаах инбэлиит, Өймөкөөн улууһа