Маҥан рододендрон үүммүт

Бу күннэргэ Саха сирин “сакуратынан” аатырар рододнедрон тыллан, социальнай ситимнэргэ киэҥник тарҕатан, дьон хараҕын үөртэ. Бүгүн “Саха сирэ” саайтка таһаарыҥ диэн анаан-минээн маҥан сибэккилээх рододендрону ыыттылар. Бу ханна үүммүт?

Саха сиригэр тэтэркэй (розовай) өҥнөөх  рододендрон үүнэр. Онтон бу тоҕо маҥан сибэккилээҕий, атын көрүҥэ буоллаҕа дуу, диэн чопчу билээри учуонайдартан туоһуластыбыт. Биология билимин дуоктара, РНА СС криолитозона биологическай чинчийиитин институтун дириэктэрин солбуйааччы Александр Исаев: “Ити альбинос, рододендрон туспа көрүҥэ буолбатах. Кыыл, дьон ортотугар альбинизм диэн баар, үүнээйигэ эмиэ ол курдук. Ханнык эмэ көлүөнэҕэ тахсыан сөп” – диэн быһаарда.

Бу кыыллаахтарга чэмпэрээк диэн аатынан киэҥник биллэр рододендрон хаартыскатын бэҕэһээ Өлүөхүмэ улууһун Даппарай сэлиэнньэтигэр бииргэ төрөөбүттүү Саргылаана, Владислав Корниловтар суолунан ааһан иһэн түһэрэн үйэтиппиттэр. Тэтэркэй өҥнөөх рододендрону кытта сэргэстэһэ үүммүттэрэ өссө ордук кэрэтик көстөр.