Арыылаахха «Манчаары оонньуулара» алгыстаах уотун уматтылар

Номоххо киирбит Баһылай Манчаары төрөөбүт алааһыгар – Арыылаахха – бүгүн, бэс ыйын 20 күнүгэр, национальнай успуорт көрүҥнэригэр «Манчаары оонньуулара» XXII спартакиада алгыстаах уотун уматтылар.

Уот эстафетата Мэҥэ Хаҥалас улууһун сэлиэнньэлэрин хабыаҕа, оттон бэс ыйын 27 күнүгэр Дьокуускай куорат «Үс Хатыҥ» сиригэр-уотугар кэлиэҕэ. Салгыы Чурапчы улууһугар сылдьыаҕа уонна от ыйын 8 күнүгэр оонньуулар ыытыллар сиригэр тиийиэҕэ.

Уоту алгысчыт Спиридон Григорьев –Илгэлээх уматта. Кини уоту эстафета салайааччытыгар, Саха сирин физическэй култууратын уонна успуордун үтүөлээх үлэһитигэр Дмитрий Гороховка туттарда.

«Бүгүн биһиги уот эстафетатыгар старт биэрэбит. Бу уот Таатта улууһугар «Манчаары оонньууларыгар» үөрүүлээх быһыыга-майгыга уматыллыаҕа. Уот уматыы алгыһа Баһылай Манчаары төрөөбүт алааһыгар уматыллыбыта бэлиэ түгэн буолар.

Биһиги национальнай успуорт көрүҥнэригэр Спартакиаданы үрдүк таһымнаахтык ыытыахпыт диэн эрэллээхпит», – диэн физическэй култуураҕа уонна успуорка миниистирэ Леонид Спиридонов эттэ.

Таатта улууһун баһылыга Айаал Бурцев бэлиэтээбитинэн, уот эстафетата улуус саҥардыллыбыт кыраныыссатыгар үөрүүлээх быһыыга-майгыга көрсүллүөҕэ. Уот эстафетатыгар араас улуустартан аан дойду чөмпүйүөннэрэ, успуорт маастардара, үтүөлээх тириэньэрдэр уонна физическэй култуура диэйэтэллэрэ кыттыахтара, кинилэр ортолоругар – Татьяна Жиркова, Константин Жирков, Марфа Троева, Гаврил Нохтунскай, Екатерина Драгунова, Владимир Тордуянов, Владимир Находкин, Александра Мохначевская, Мария Дьяконова уо.д.а.

Национальнай спорт көрүҥнэригэр XXII «Манчаары оонньуулара» спартакиада Таатта улууһун Ытык Күөл сэлиэнньэтигэр бу сыл от ыйын 7 күнүттэн 12 күнүгэр диэри ыытыллыаҕа.