«Манчаары оонньуулара». Күрэс тылдьытын сырдаттылар

Бүгүн А.Е.Мординова аатынан Тааттатааҕы лиссиэйгэ «Нууччалыы-сахалыы күрэс тылдьытын» сырдаттылар.

Бу иһитиннэрэр-биллэрэр эйгэ (ИБЭ) үлэһиттэригэр көмө быһыытынан таһаарбыттар. Салгыы ситэриллэн-хоторуллан иһиэхтээх. Суруналыыстары кытта көрсүһүүгэ СӨ Бырабыыталыстыбатын Бэрэссэдээтэлин солбуйааччы С.Местников, СӨ физическэй култууратын уонна успуордун миниистирэ Л.Спиридонов, суруналыыс, хаартыскаҕа түһэрээччи В.Коротов уо.д.а. кыттыыны ыллылар. Тылдьыт туһунан сырдаттылар.

Маныаха тылдьыты билиһиннэрии, сырдатыы «Манчаары оонньууларын» далааһынаах тэрээһинигэр кэлбит суруналыыстарга, күрэсчиттэргэ, ыҥырыылаах ыалдьыттарга ыытыллыбыта үлэни саҕалыырга тирэх буоларын бэлиэтээтилэр. Итиэннэ бу далааһыннаах тэрээһиҥҥэ суруналыыстар бу тыллары туһанаргыт буоллар, норуокка тарҕатыыга, дьон өйүгэр-санаатыгар иҥэрэргэ, кэлэр өттүгэр далаһа ууруллуо, тирэх буолуо этэ диэтилэр. Көсрүһүүлэр манан муҥурдаммакка, кэлэр да өттүгэр буолуохтарын эттилэр. Онон санааны үллэстэргэ, этиини истэргэ бэлэмнэрин биллэрдилэр.

Холобур бу тылдьакка маннык тыллар бааллар: многоборье — дэгит күрэс, многоборье якутское — саха дэгит күрэһэ, многоборье северное — хотугу дэгит күрэс. спортзал — күрэс саалата, спортсмен — күрэсчит, фаворит — чулуу, бастыҥ, уо.д.а.