«Манчаары оонньуулара»: Тааттаҕа айан суола хайдаҕый?

Тааттаҕа ыытыллыахтаах «Манчаары оонньууларынан» үгүс дьону айан суола хайдаҕа долгутар.

Мин бэҕэһээ, от ыйын 5 күнүгэр Тааттаҕа айан суолун кыра массыынанан туттум. Паромҥа уочарата суох киирдим. Бэстээхтэн Чурапчыга диэри аспаал суола тыргыллар. Онтон Чурапчыттан урукку аспаал алдьаммыта балачча охсуулардаах. Онон ити диэки аһары түргэнник айанныыр сэрэхтээх.

Таатта кыраныыссатыттан айан суола үчүгэй. Кыраныысса саҥардыллыбыт, сахалыы таҥастаах кыргыттар айхаллыы көрсөллөр. «Манчаары оонньууларын» тыына кыраныыссаттан биллэр. Улуус үрдүк таһымнаах тэрээһиҥҥэ бэлэмин туоһулуур.

Чөркөөххө киириибитигэр үс грейдер тэҥинэн суолу кыһа иһэллэрэ. Онон, суол Ытык-Күөлгэ диэри оһуобай. Айан аартыгар турар Таатта нэһилиэктэрин ааттара саҥардыллыбыт, күн уотугар күлүмүрдээн олорор. Онон ытык Таатта сиригэр куттала суох айан суолун тутуҥ.