«Манчаары оонньуулара» уонна “Андаҕар” испэктээк

Тааттабытыгар «Манчаары оонньуулара», төһө да ардах мэһэйдээтэр, олус бэркэ бара  турарыттан дойдулаах дьон наһаа үөрэбит.

Төрүт көрүҥнэргэ күрэҕи сэргэ баай, дириҥ ис хоһоонноох култуурунай тосхол олус бэркэ толкуйданан ыытылла турара кэлбит ыалдьыттары, олохтоохтору сэргэхситтэ, Таатта дириҥ устуоруйатын, талааннаахтарын үлэлэрин бар дьон сөхтө-махтайда.

От ыйын 9 күнүгэр Былатыан Ойуунускай аатынан тыйаатырга бэйэбит уолбут Утум Захаров суруйуутунан саха тустууктарыгар анаммыт «Андаҕар» испэктээги Саха тыйаатырын артыыстара оонньоон көрдөрбүттэрин дохсун ытыс тыаһынан, өргө диэри дуорайбыт: «Браво!», — хаһыынан өрөгөйдөөн көрүү буолла.

Испэктээккэ улуу тириэньэр Дмитрий Коркин оруолун таатталар киэн туттар уолбут Иннокентий Луковцев олус итэҕэтиилээхтик оонньоото. Уопсайынан, бу испэктээккэ Тааттаттан төрүттээх алта артыыс оонньообута олус үөрүүлээх. Таатта култууратын бас салайааччыта Гаврил Вырдылин биир дойдулаахтарбытын бэлиэтээн чиэстээбитин дохсун ытыс тыаһынан доҕуһуоллаатыбыт.

Мин 84 сааһыгар сылдьар саха норуодунай артыыһа, испэктээккэ Д.П. Коркин кэргэнин оруолун оонньообут Зоя Петровна Багынановалыын кэпсэтэ сырыттым.

Зоя Петровна:

«Таатталар куруук буоларын курдук, олус бэркэ көрүстүлэр. Сылаас бэйэлээх уһуйаан дьиэтигэр  түһэрэн, аспытын-таҥаспытын бэрийэн, ытыс үрдүгэр сылдьан кэллибит.

Испэктээккэ көрөөччү толору. Олус истиҥник ылынан, дохсун ытыс тыаһынан доҕуһуоллаан көрдүлэр. Бу буола турар оонньуулары кытта ыкса ситимнээх буолан, көрөөччү дьиҥнээхтик ис сүрэҕинэн ылынан, көрө-истэ олорор иэйиитин оонньуу сылдьан, илэ  ылынныбыт.  Таатталар куруук да итинник көрөөччүлэрдээх буолаллар, онон артыыстар Тааттаҕа кэлэллэриттэн олус үөрэллэр.

Түгэнинэн туһанан, наһаа да үчүгэй поликлиникаламмыккыт диэн бэлиэтээн этиэхпин баҕарабын. Стоматолог быраас Сивцев Павел хас да күн тииһим миилэтэ ыалдьан сордообутун эмтээн абыраата.

Бу  быраас:  «Ытык Күөлгэ  ханнык  аадырыска  олороҕун?” —  диэтэ  ээ. Олохтоох  эмээхсин  көрдөрө  киирдэ  диэн  бэркэ  кыһаллан, сүбэлээн  эмтээбитэ  эчи  үчүгэйин!  Балыыһа  тулалыыр  эйгэтэ  үчүгэйэ  сөхтөрдө, кылаабынай  быраас  үҥкүү  эйгэлээҕэ  баһылаан  олорор тэрилтэтигэр  кытта  биллэр  эбит:  үлэһиттэрэ  эйэҕэстэрэ, сыһыаннара  үчүгэйэ  манньытта.

Бу  балыыһа  үҥкүүһүттэрин, «Туруйалар» үҥкүүлэрэ  Расул  Гамзатов   пуондатын сайтыгар  киирбит  эбит дии.

Онон  «Манчаары  оонньуутун»  тэрээһинин, дьонун-сэргэтин, аһын-үөлүн, сылаас  сыһыаннарын  бары  өттүнэн билэн,  астынан кэллим.

Манна  даҕатан эттэххэ, Саха  тыйаатырын  артыыстара чуолаан,  Роман  Дорофеев, Иннокентий  Луковцев, Марианна  Федотова  ааттарын  биир  дойдулаахтара  киэн  тутта  ааттаабыттара  үчүгэйин…

Ааптар  Утум  Захаров  суруйуутун режиссер  Сергей  Потапов  маннык  көрөөччүнү  долгутар, үөрдэр, сүргэтин  көтөҕөр  гына  туруорбутун  сөҕөбүн  уонна  бары  кыттыбыт  артыыстарбар  махтанан  сүгүрүйэбин!  Мэлдьи маннык  үрдүк  таһымнаахтык  үлэлии-хамныы  сылдьыаҕыҥ! БРАВО!”  — диэн  тапталлаах артыыспыт Зоя Петровна кэпсээнин түмүктээтэ.

 Зоя Багынанова таатталар тэрээһиммитигэр кэлэн кыттыспытыгар, дириҥ ис хоһоону ситэрсэн биэрбитигэр барҕа махталбытын тириэрдэбит! Этэҥҥэ эрэ сылдьан, сырдыгы, үйэлээҕи айа тур диэн алгыспытын аныыбыт! Зоя Петровнанан сирэйдээн, бары артыыстарга махтанабыт! Айымньылаах үлэлэригэр ситиһиини баҕарабыт!

Валентина КРИВОШАПКИНА, Таатта, Харбалаах