“Манчаары оонньууларыгар” бэлэмнэнии бүтэһик түһүмэҕэр тиийдэ

Айсен Николаев Манчаары оонньууларыгар бэлэмнэнии хаамыытын көрдө. Успуорт төрүт көрүҥнэригэр XXII спартакиада быйыл сайын Таатта улууһугар ыытыллыаҕа.

Ил Дархан эбийиэктэри тутуу үлэтин кэмигэр бүтэрэргэ сорудахтаата. Ытык Күөлгэ элбэх хайысхалаах успуорт-чэбдигирдэр комплекса уонна сүүрэр суоллаах 1000 миэстэлээх стадион тутуута бүтэн эрэр.

Бу эбийиэктэри таһынан, күрэхтэһиилэр Татта лиссиэйин былаһааккатыгар буолуохтара. Спартакиаданы көрсө улуус киинигэр 100 миэстэлээх интэринээттээх 450 миэстэлээх оскуола тутуллубута.

Биллэрин курдук, күрэхтэһиигэ кыттарга өрөспүүбүлүкэттэн барытыттан 1,1 тыһ. тахса спортсмен сүүмэрдэммитэ. Ол курдук, 16 квалификационнай күрэхтэһиигэ барыта 1710 путевкаттан 1134 оонньонно. Успуорт үс көрүҥэр сүүмэрдээһини ыытыахтара.

“Эбийиэктэри тутууга улахан үлэ барда, чуолаан Ытык Күөлгэ инфраструктураны бэлэмнээһиҥҥэ, сүүмэрдиир күрэхтэһиилэри, култуура бырагырааматын бэлэмнээһиҥҥэ. Өрөспүүбүлүкэбит төрүт көрүҥнэригэр сүрүн күрэхтэһии үрдүк таһымнаахтык ааһарын туһугар түмүктүүр түһүмэххэ болҕойор ирдэнэр” – диэн Айсен Николаев эттэ.

Улуус дьаһалтата дьону түһэриигэ 30 эбийиэги уонна кыттааччылар, ыалдьыттар аһыылларыгар 13 эбийиэги бигэргэппит.

Үгэс быһыытынан, Манчаары оонньууларын уотун бэс ыйын 27 күнүгэр норуот дьоруойа Василий Федоров-Манчаары төрөөбүт алааһыгар – Мэҥэ Хаҥалас улууһун Арыылааҕар уматыахтара. Спартакиада үөрүүлээх аһыллыыта от ыйын 8 күнүгэр буолуоҕа, тэрээһин сабыллыыта – от ыйын 12 күнүгэр.

Ил Дархан түмүгү таһаарарыгар болҕомтону Таатта улууһугар төрдүс кылаастаах баһаар турар куттала баарыгар туһаайда итиэннэ ойуур баһаарын эрдэттэн туоратыыга, ол иһигэр, нэһилиэнньэ ортотугар сэрэтэр үлэни ыытары сорудахтаата.

Бу туһунан Ил Дархан уонна Бырабыыталыстыба пресс-сулууспата суруйар.