«Манчаары оонньууларыгар» биир кыракый нэһилиэктэн биэс спортсмен кытта сылдьар

Бэҕэһээ «Манчаары оонньуулара» Ытык Таатта сиригэр өрө көтөҕүллүүлээхтик аһылынна. Ытык Күөл «Дьулуруйар Ньургун Боотур» стадиона Саха сирин бастыҥ спорстменнарын түмтэ.

Бу оонньууларга Уус Алдан халыҥ хамаандата кытта сылдьар. Ол иһигэр Окоемовка диэн кырачаан нэһилиэгиттэн биэс спортсмен араас көрүҥнэргэ киирсэр.

Ох саанан ытыыга – успуорт маастарыгар хандьыдаат Октябрина Жиркова (дьахталларга), успуорт маастарыгар хандьыдаат Сайаана Ушницкая (кыргыттарга), мас-реслиҥҥэ СӨ успуордун маастара Семен Бурнашев (бэтэрээннэргэ), мас тардыһыытыгар  Арассыыйа успуордун маастара Егор Атласов, гиирэ анньыытыгар СӨ успуордун маастара Елизавета Аммосова төрөөбүт дойдуларын чиэстээхтик көмүскүү сылдьаллар.

200-кэ киһи олорор Окоемовка нэһилиэгэ улуус кииниттэн – Бороҕонтон 45 км, Сыырдаах сэлиэнньэтиттэн 30 км тэйиччи сытар. Бу нэһилиэк 1945 сыллаахха 1 Курбуһах нэһилиэгин иһинэн төрүттэммитэ. 1967 сыллаахха дэриэбинэттэн 5 км хоту сытар Кырдал диэн сиргэ төрөөбүт Саха сирин уһулуччулаах судаарыстыбананй диэйэтэлэ Николай Николаевич Окоемов аатынан уларытыллан ааттаммыта.

Кыракый нэһилиэктэн маннык улахан күрэхтэһиигэ биэс киһи кыттыыта – бу бэйэтэ улахан ситиһии, өрөспүүбүлүкэҕэ маннык көстүү аҕыйах буолуо. Ол аата өбүгэлэрбит үтүө үгэстэрин тута сылдьар, төрдүттэн көхтөөх, кыахтаах, успуорка күүстээх тардыһыылаах дьон манна олорор эбит диэн өйдүөххэ сөп.