«Манчаары оонньууларын» өрөгөй ырыатын кыайыылаахтарын хамыыһыйа быһаарда

Бүгүн, олунньу 20 күнүгэр, «Манчаары оонньуулара» успорт национальнай көрүҥнэригэр XXII Спартакиада өрөгөй ырыатын бырайыагын оҥорууга күрэхтэһии иккис түһүмэҕэ түмүктэннэ.

СӨ култуураҕа уонна духуобунай сайдыыга миниистирин бастакы солбуйааччы Мария Турантаева салалтатынан ыытыллыбыт куонкурус хамыыһыйатын мунньаҕа кыайыылаахтары икки номинацияҕа — гимн тиэкиһин бырайыагын уонна мелодиятын оҥорууга арааран быһаарда.

Култуура уонна духуобунас министиэристибэтин пресс-сулууспата иһитиннэрбитинэн, куонкурус бастакы түһүмэҕэр талыллыбыт ырыа тылларыгар сөп түбэһэр мелодияны айыыга 19 үлэ киирдэ. Хамыыһыйа чилиэннэрэ киирбит композициялары барытын иһиттилэр уонна анал критерийинэн куоластаатылар.

Куоластааһын түмүгүнэн “Манчаары оонньуулара” мелодия бырайыагын кыайыылааҕынан “Айар уустар” Дьокуускайдааҕы креативнай индустрия кэллиэһин бастакы кууруһун устудьуона Ариана Егоровна Решетникова буолла. Тиэкис барылын кыайыылааҕынан «ОДО» этнокомплекс дириэктэрин солбуйааччы Дьулустаан Афанасьевич Толстяков буолла.

Кыайыылаахтар иккиэн хас биирдии бырайыактарыгар  — гимн тиэкиһигэр да, мелодиятыгар да кырааматалары уонна 20 000 солкуобай суумалаах харчынан бириэмийэтин ылыахтара.

 

Дьулустаан Толстяков

 

Сайыммытын уруйдаан

Тоҕуоруһа мустаммыт,

Бастыҥ дьону быһаарар

Түһүлгэҕэ киирдибит.

 

Үйэлээх үгэс буолбут

Норуот таптыыр күрэҕэ

Манчаары оонньуулара

Саха омук сүрэҕэр.

 

Номох буолбут убайбыт

Сүдү-сүҥкэн кылаата

Манчаары оонньуулара

Саха спордун чыпчаала

 

Кэрэ куону сырсаннар

Сүүрүүктэр түһүннүлэр,

Мас тардыһыы, хапсаҕай,

Соноҕостор көттүлэр.

 

Саха дьонун бастыҥа

Манчаарыны уруйдаан,

Маннык үрдүк таһымҥа

Кыайыылааҕы айхаллаан!