«Манчаары оонньууларын» иитинэн маассабай сүүрүү тэриллиэ

Маннык тэрээһини Таатта улууһа, нэһилиэк олохтоохторо, улуустааҕы чэпчэки атлетика федерацията тэрийэллэр. Уһуну сүүрүү күрэс төрүт көрүҥнэригэр «Манчаары оонньууларын» иитинэн дьону чэгиэн, чөл олоххо көҕүлүүр сыаллаах-соруктаах ыытыллар.

Маныаха улуус баһылыга А.С.Бурцев уһуну сүүрүүгэ номнуо үөрүйэхтэммиттэрин, быйыл Аҕа дойду уоттаах сэриитигэр Улуу Кыайыы 80 сылынан тэрийэ сылдьыбыттарын, онно сүүстэн тахса киһи кыттыыны ылбытын этэр. Кыттааччылар да, тэрийээччилэр да олус сөбүлээбиттэр, сэҥээрбиттэр. Санаалара табыллан, көтөҕүллэн бу далааһыннаах тэрээһиҥҥэ болҕломтону тардар туһуттан тэрийэргэ диэн этии киллэрбиттэр. Онно «Манчаары оонньууларын» тэрийэр хамыыһыйатын сөбүлэҥин ылбыттар.

Онон сарсын, от ыйын 10 күнүгэр, Ытык Күөлгэ түүн уһуҥҥа сүүрүү ( 1, 3, 5, 10 км) буолаары турар. Манна уопсайа 700-тэн тахса киһи улуустартан кыттар баҕалааҕын биллэрбит, сайаапкаламмыт. Элбэх киһи кыттыылаах сүүрүү  23 ч.30 м. А.Е.Турнин аатынан күрэс дыбарыаһыттан саҕаланар. Кыттар дьон номнуо кэлэн, далааһыннаах тэрээһиннэри көрөн-истэн, налыччы сарсыҥҥы сүүрүлэригэр бэлэмнэнэллэр.