«Манчаары оонньууларын” култуурунай бырагырааматын торумнаатылар

Култуура уонна духуобунас миниистирэ Афанасий Ноев «Манчаары оонньуулара» успуорт национальнай көрүҥнэрин XXII Спартакиадатын култуурунай бырагырааматыгар туһуламмыт сүбэ мунньаҕы ыытта.

“Таатта улууһугар ыытыллар оонньуулар успуорт араас көрүҥнэригэр күрэхтэһии эрэ курдук буолбакка, саха литературатын төрүт сиригэр, сахалар духуобунай кииммитигэр ыытыллар өрөспүүбүлүкэ биир суолталаах тэрээһинэ. Онон культурнай бырагыраама сүрүн соруга — улуус култууратын уратытын көрдөрүү, ону тэҥэ кыттааччыларга уонна ыалдьыттарга саха норуотун баай устуоруйатын, үгэстэрин кытта билиһиннэрии буолар.

Оонньууларга элбэх тэрээһин ыытыллара былааннанар.  Ол курдук, Таатта улууһун түмэллэрэ ааннарын тэлэччи аһан ыалдьыттарын көрсүөхтэрэ, норуот уус-уран айымньытын, оҥоһуктарын быыстапкалара, күрэхтэһиилэр, кэнсиэрдэр буолуохтара.  Оонньуулары аһыы уонна сабыы сиэрэ-туома, ону тэҥэ успуорт национальнай көрүҥнэригэр анаммыт кинигэлэри билиһиннэрии биһирэмнэрэ ыытыллыаҕа.

Онон «Манчаары оонньуулара» тэрээһин култуурунай бырагыраамата өрөспүүбүлүкэ култуурунай нэһилиэстибэтин харыстыыр, тарҕатар былаһаакканан буолуоҕа. Кэрэхсэбиллээҕэ баар, нацилональнай көрүҥнэр спартакиадалара Таатта улууһун киэн туттуута Алексей Елисеевич Кулаковскай-Өксөкүлээх Өлөксөй төрүттээбит саха суругунан литературата төрүттэммитэ 125 сылыгар ыытыллар”, —  диэн миниистир Афанасий Ноев бэйэтин телеграм-ханаалыгар https://t.me/афанасий_ноев) суруйда.