«Манчаары оонньууларын» «Матч-ТВ көрдөрүөхтэрэ

Таатта улууһугар күрэс төрүт көрүҥнэригэр далааһыннаах тэрээһин ыытыллара чугаһаата.

Бэлэмнэнии, түбүк-садьык төһөлөстө? Далааһыннаах тэрээһин түһүлгэтин тэрийэргэ, үрдүк таһымнаахтык ыытарга кимнээх көмөлөстүлэр, өйөбүл буоллулар? Бу уонна да атын ыйытыыларга тэрээһин ыытыллара чугаһаабытынан көрсөн кэпсэтии бэчээт дьиэтин иккис мэндиэмэнигэр медиа-кииҥҥэ буолла.

Чопчулаан эттэххэ, Тааттаҕа Ытык Күөлгэ «Манчаары оонньуулара» от ыйын 7-12  күннэригэр ыытыллаары турар. Түһүлгэҕэ 7000-тан тахса киһи түмсэн кыттыыны ылыаҕа. Успуорт 11 араас көрүҥэр бастыҥтан-бастыҥ спортсменнар ох курдук оҥостон, кустук курдук куоһанан кэлэннэр, эрбии тииһин курдук эгил-тэгил эриһиэхтэрэ, илин-кэлин түсүһүөхтэрэ. Уопсайа 1772 спортсмен, 300 судьуйа кэлэрэ күүтүллэр. Маны таһынан, 200 волонтер үлэлиэ, көмөлөһүө диэн этэллэр. Оттон далааһыннаах тэрээһини «Матч-ТВ» көрдөрөргө бэлэм.

Бэҕэһээҥҥи көрсүһүүгэ дьон-сэргэ Олимпиадаҕа холуу тутар «Манчаары оонньууларыгар» кимнээх көмөлөрүн, өйөбүллэрин оҥорбуттарын киэн тутта, махтана ааттаатылар. Ол курдук, «Строймост», «Эксперт Телеком», «Скам-групп», «Сэттэ», «УЧУР.РУ», «Сириус», «Уруу» ХЭУо, ИП Петров Спартак Иванович, «Зодиак» култуура киинэ, «Монтажник» кооператив, ИП Дарбасов Юрий Агитович,  ИП Игнатьев Сергей Сергеевич, АЛРОСА, «Водоканал» АУо, «Анаабыр алмаастара», «Полиметалл» АУо, «Алмаасэргиэнбаан» АКБ, уо.д.а.

«Манчаары оонньууларыгар» бэлэмнэнии үлэ-хамнас туһунан сиһилии https://www.sakha.gov.ru/news/6282  көрүөххэ сөп.