«Манчаары оонньуулара-2025». Спортивнай таҥастар, мэтээллэр

Күрэс төрүт көрүҥнэригэр XXII «Манчаары оонньууларынан» медиа-кииҥҥэ суруналыыстары кытта көрсүһүү буолла.

Манна далааһыннаах тэрээһиҥҥэ бэлэмнэнии үлэлэри сырдаталларын сэргэ, спортсменнарга анаммыт спортивнай формалары, мэтээллэри  көрдөрдүлэр.

Манна даҕатан эттэххэ, «Манчаары оонньуулара» быйыл Таатта улууһугар от ыйын 7-12 күннэригэр ыытыллар.

СӨ Бырабыыталыстыбатын Бэрэссэдээтэлин солбуйааччы Сергей Местников:

—Эппиэттээх кэм үүннэ. Кэлэр нэдиэлэттэн «Манчаары оонньууларын» официальнай тэрээһиннэрэ саҕаланыахтара. Түгэнинэн туһанан, бу далааһыннаах тэрээһиҥҥэ бэлэмнэниини түмүктүүр түһүмэҕинэн, спортивнай суруналыыстар күннэринэн эҕэрдэлиибин,— диэтэ.

Кини икки күннээҕитэ Тааттаҕа Ытык Күөлгэ сылдьан тэрээһиҥҥэ бэлэмнэниини, күрэхтэһиилэр ыытыллар сирдэрин, спортсменнар, ыалдьыттар түһэр сирдэрин көрбүттэрин эттэ. Итиэннэ Таатта улууһа, тэрийэр кэмитиэт Оонньуулары ыытарга бэлэмнэр диэн түмүгү оҥорбуттарын бэлиэтээтэ.

Успуорт миниистирэ Леонид Спиридонов:

— Успуорду суруйар суруналыыстар ахсааннара сыллата элбээн иһэр. Успуордунан сөбүлээн дьарыктанар, сэҥээрэн ккөрөр, сэргииир дьон ахсаана эмиэ элбиир. Бу спортивнай суруналыыстар өҥөлөрө буолар, — диэтэ кини.

Салгыы спортсменнар формаларын, мэтээллэри көрдөрдүлэр. Түмүккэ суруналыыстар ыйытыыларыгар хоруйдаатылар, хаартыскаҕа түстүлэр.

Хаартыскалар С.Николаева түһэриилэрэ