Манчаары оонньууларын судьуйалара күрэхтэһии былаһааккаларын үөрэттилэр

Бу күннэргэ Таатта улууһугар Манчаары оонньууларыгар бэлэмнэнии бары хайысхаларга тэтимнээхтик ыытыллар.
Бу туһунан «Саха» НКИХ Тааттатааҕы филиалын суруналыыһа Жанна Бурмистрова маннык иһитиннэрдэ:
— Манчаары оонньууларыгар хамаандалары олордор эбийиэктэрин өрө тардыы, күрэхтэһии ыытыллар түһүлгэлэригэр араас үлэ бара турар. Суудьуйалар күрэхтэһии ыытыллар былаһааккыларын ымпыгар-чымпыгар диэри үөрэттилэр, көрдүлэр-иһиттилэр уонна кэккэ түмүккэ кэллилэр.  Холобура, күрэхтэһии ыытыллар саалаларын уһунун, кэтиттэрин кээмэйдээн көрүүгэ күн тыгар сырдыгар тиийэ болҕомто уурулунна.

Улуустар спортсменнара үөрэх тэрилтэлэринэн түһүөхтэрэ. Судьуйалары уонна спортсменнары олордуу, аһатыы хамыыһыйата тустаах эбийиэктэри көрөн баран,  суолталаах быһаарыылары ылынна. Ол курдук, тэрилтэлэр куукуналара кыраларынан, улахан ас астыыр тэриллэр баппаттарынан, бурдук  уонна эт астары астаан тарҕатар биир куукуна үлэлиэҕэ. Олордор, астыыр эбийиэктэри бэс ыйын 23 күнүттэн көҥүл биэрэр хамыыһыйалар өссө төгүл көрүөхтэрэ. От ыйын 4 күнүгэр олоччу бэлэм эбийиэктэргэ сэртипикээттэри туттарыахтара.