Хаартыска: ааптар тиксэриитэ
«Манчаары оонньууларын» аһыллыытын, сабыллыытын тэрийэргэ сүбэ мунньах бэс ыйын 7 күнүгэр Таатта улууһугар И.В.Николаев аатынан Харбалаахтааҕы сынньалаҥ киинигэр 10 чаастан Амма үс нэһилиэгин олохтоохторо кыттыылаах буолан ааста.
Мунньахха кытыннылар: «Манчаары оонньуулара» үөрүүлээх аһыллыытын, сабыллыытын режиссера Дороофеев Роман Романович, режиссеру солбуйааччы Луковцев Иннокентий Егорович, «Манчаары оонньуулара» үөрүүлээх аһыллыытын, сабыллыытын худуоһунньуга Тихонова Дора Васильевна, Тааттатааҕы норуот айымньытын дьиэтин салайааччы Вырдылин Гаврил Гаврильевич, Былатыан Ойуунускай аатынан Таатта норуодунай тыйаатырын режиссера Бурнашева Валентина Федосьевна.
Үс нэһилиэк баһылыктара Е.В.Васильев, А.И. Кулачиков, С.П.Старостин Култуура кииннэрин үлэһиттэрин кытта тэрээһиҥҥэ быһаччы кыттыыны ылар дьоннорун түмэн кэлбиттэр. Оонньуу култуурунай чааһын тэрийээччилэр үөрүүлээх арыйыы, сабыы хаамыытын билиһиннэрдилэр, туох үлэ бара турарын сиһилии кэпсээтилэр. Таатта норуодунай тыйаатырын режиссера Валентина Бурнашева нэһилиэктэртэн кыттар дьонтон туох ирдэнэрин, ханнык күннэргэ бэлэмнэнии буоларын олус чуолкайдык быһааран биэрбитин мустубут дьон бары сэргээн иһиттилэр. Таатта култууратын салайааччыта Гаврил Вырдылин баһылыктар туохха болҕомтолорун ууруохтаахтарын тоһоҕолоон бэлиэтээтэ. Онтон үс нэһилиэк салайааччылара бэйэлэрин санааларын эттилэр. «Манчаары оонньуулара» үрдүк таһымҥа ааһалларын туһугар бары түмсүөҕүҥ диэн ыҥырыы эттилэр.
Уус Амма баһылыга Егор Васильев: «Таатталар бары түмсэн, урукку да сылларга улахан тэрээһиннэри дьон кэрэхсиирин курдук тэрийбиппит. Бу да сырыыга оннук буолуо!»- диэн эрэлин биллэрэн туран, сүрүн режиссер Роман Дорофеевка алгыстаах бэлэҕин туттарда.
Мунньахха кэлбит дьон мунаарар ыйытыктарыгар сөптөөх хоруйдары истэн, астынан тарҕастылар. Таатталар бары тугу кыайарбытынан көмөлөһөн, сомоҕолоһон «Манчаары оонньууларын» үрдүк таһымҥа тэрийэн ыытыаҕыҥ!
Валентина КРИВОШАПКИНА, Харбалаах, Таатта
Бу быраабыланы кэһии иһин ыстараап кээмэйэ сокуоннай саастарын ситэ илик оҕолорго табах бородууксуйатын атыылааһын иһин…
Хас биирдии үөрэнээччи күннэтэ суругунан үлэни толорор. Ол гынан баран, аныгы үйэ тэриллэрэ сайданнар, дьон…
Оҕо бастакы күнүгэр ытаан-соҥоон уһуйааҥҥа барарыгар, сарсын үчүгэй буолуо диэн бэйэҕитин уоскутунаҕыт. Ол эрээри, биир…
Кэлиҥҥи сылларга дойду үрдүнэн чоҕу хостуур салаа кэккэ ыарахаттары көрүстэр да, Саха сирэ төттөрүтүн үрдүк…
Роспотребнадзор тымныйыы, ОРВИ, кириип уонна коронавирус саҥа сезона саҕаланыан иннинэ илиини чаастатык суунары, дистанцияны тутуһары,…
…Оҕо саас уһаабатаҕа. Ол иһин Николай Саввич күн сирин көрбүт, оҕо буолан оонньообут кэмиттэн, эппиккэ…