Манчаары оонньууларын көрсө талахтан кур оҥордулар

Быйыл Таатта улууһун дьоно “Манчаары XXII оонньуулара” ситиһиилээхтик ыытылларыгар бука бары туруна сылдьаллар.

Кулун тутар 29 күнүгэр Тааттатааҕы “Сатабыл” оҕо айымньытын дьиэтигэр XXII Манчаары оонньуулара саҕаланаллара 100 хонук хаалбытын бэлиэтиир үтүө күҥҥэ “Аҕа оҕотунаан” маастар-кылаас ыытылынна. Ытык Күөл тэрилтэлэриттэн өбүгэлэрин төрүт сатабылын кэнчээри ыччаттарыгар  уһуйа сылдьар бастыҥ дьиэ кэргэттэр аҕалара оҕолорунаан, сиэннэринээн түмсэн, Тааттабыт үөл талаҕын эт илиилэринэн тутан-хабан, ойууну-бичиги  түһэрэн, быһыытын-таһаатын дьүөрэлээн, илиилэрин сылааһынан истиҥ санааларын иҥэрэн, бары сатабылларын туһанан Дьайааччы курун таҥан оҥордулар. Маастар-кылаас саамай кыра кыттааччыта үс  саастаах Исмаил эһэтинээн Иван Федотовичтыын кэлэн талаҕы нырылаан, дьоһумсуйан, тэҥҥэ айар кут абылаҥар кыттыста. Бэйэлэрин төрөөбүт сирдэрин-уоттарын ытыктаан, сатабылларын сайыннарар баҕалаах, Манчаары оонньуларын тэрээһинигэр күүс-көмө буолар сыаллаах биир дойдулаахтарбытыгар Лева, Миша уонна Михаил Петрович Тарасовтарга, Даниил уонна Федор Иванович Павловтарга, Игнат уонна Виктор Семенович Григорьевтарга, Исмаилга уонна Иван Федотович Рахлеевтарга, Афанасий Афанасьевич Варфоломеевка уонна Саша Сидоровка, Даниилга уонна Павел Филиппович Иовлевтарга, Сайаан уонна Станислав Гаврильевич Бубякиннарга дириҥ махталбытын тиэрдэбит.

Тааттатааҕы «Сатабыл» оҕо айымньытын дьиэтин үлэһиттэрэ ыытар үлэлэрин сэргиир, туох-хайдах кыалларынан өйүүр дьоммутугар-сэргэбитигэр куруутун махтанабыт, үтүөнү баҕарабыт!

Кэлэр Манчаары оонньуутугар бэлэмнэнии үлэтигэр дьоһун кылааты киллэрсэр дьон баарыттан астынабыт уонна инникитин даҕаны талыы талба Тааттабыт сайдарыгар, үтүө аата өрөгөйдүү турарыгар тэҥҥэ үлэни-хамнаһы өрө тутуохтара, күүс-көмө буолуохтара диэн эрэнэбит!

Татьяна Портнягина, Тааттатааҕы «Сатабыл» оҕо айымньытын дьиэтин методиһа.