«Манчорай» эбэҥки үҥкүүтэ — өрөспүүбүлүкэтээҕи этническэй култуура реестригэр

Олоҥхо ыһыаҕын биир элбэх ахсааннаах кыттааччылаах уонна ураты оҥоһуулаах былаһаакканан аҕыйах ахсааннаах норуоттар түһүлгэлэрэ буолла.

Бүгүн бу манна Ил Дархан Айсен Николаев анаан ыалдьыттаата. Өрөспүүбүлүкэ Аҕа баһылыга Олоҥхо ыһыаҕын кэмигэр үөрүүлээх сонуну иһитиннэрдэ. Ол курдук, соҕуруу Саха сирин эбэҥкилэрин «Манчорай» иилии эргийэр үҥкүүлэрэ материальнайа суох этническэй култуура эбийиэктэрин Саха сиринээҕи реестригэр киллэриллибитин туһунан сибидиэлистибэни туттарда.

«Нерюнгригэ ыытылла турар Олоҥхо ыһыаҕа эбэҥки, саха нуучча уо.д.а. омуктар төрүт култуураларын көрдөрөн, улахан болҕомтону тарта. Аҕыйах ахсааннаах норуоттар култууралара төрөөбүт дойдуга таптал бэлиэтэ.

«Манчорай» 30 араас хайысхалартан сайда турар 31-с материальнайа суох култуурунай эбийиэгинэн буолла» диэн туран, Ил Дархан эбэҥки норуотугар төрөөбүт тылларын уонна култуураларын утумнаахтык сайыннаралларыгар барҕа махталын биллэрдэ.