Мандар Уус аатын алмааска иҥэрдилэр

Борис Федорович Неустроев-Мандар Уус 80 сааһын туолбутунан, АЛРОСА хампаанньа Накыын руднигыттан хостоммут 51,39 карааттаах бөдөҥ алмааска кини аатын иҥэрдэ.

Борис  Неустроев-Мандар Уус — П.Ойуунускай аатынан Судаарыстыбаннай бириэмийэ лауреата, Духуобунас академиятын академига, култуура үтүөлээх үлэһитэ, «Азия оҕолоро» пуонда стипендиата, Таатта улууһун Ытык олохтооҕо.

Кини 1945 сыл алтынньы 20 күнүгэр Алексеевскай оройуон (Таатта) Баайаҕа нэһилиэгэр төрөөбүтэ. 1969 сылтан физкультура учууталынан, 2005 сылтан Баайаҕа орто оскуолатын дириэктэрин солбуйааччынан үлэлээбитэ. «Мандар» устуудьуйа салайааччыта. Кини элбэх кинигэлэр ааптардара, элбэх суруйааччылар кинигэлэрин уруһуйдаан биэрбитэ. Элбэх быыстапкаларга кыттан, саха уус-уран оҥоһугун билиһиннэрбитэ.

Эдэр эрдэҕиттэн ойууну-мандары хомуйан, үөрэтэн, умнулла сыспыты сөргүппүт сүҥкэн үтүөлээх. Ытык Күөлгэ уопсастыбаннай-култуурунай киини, Дьокусукайга Арчы дьиэтин ис барааннарын оҥорсубута. 2011 сыллаахха Баайаҕаҕа «Мандар Уус» култуура, духуобунас киинэ аһыллыбыта.

Былырыын Мандар Уус 80 сааһын туолбутунан, үбүлүөйдээх тэрээһиннэр, ол иһигэр «Кыталык ырыата» быыстапка, буолбуттара.