Мандар Уус үбүлүөйдээх тэрээһинэ — норуот бырааһынньыга

Бүгүн «Үлэ кыбаартала» креативнай кластерга Борис Федорович Неустроев-Мандар Уус 80 сааһыгар анаммыт «Мандар Уус — саха норуотун култууратын үйэлээх илдьитэ» диэн дириҥ ис хоһоонноох тэрээһин буолла.

Манна Таатта Баайаҕатыттан анаан айаннаан кэлэн, Мандар Уус тус бэйэтинэн кыттан, санаатын атастаһан, дьонун-сэргэтин үөртэ. Тэрээһин түөрт этээһинэн ыытылынна. «Моҕол ураһа төрүт сатабылын кэрэһиттэрэ» диэн Мандар Уус утумнааччыларын кылаан үлэлэрин уонна «Мандар Уус кэпсиир» кинигэ быыстапкаларыгар, «Уус сэһэнэ» Мандар Уустуун уустар истиҥ көрсүһүүлэригэр, «Куйаары улаҕатынан, сири сиксигинэн» Мандар Уус бөлүһүөктүү ойууларын анаарыыга, «Архаикаттан аныгы үйэ аанын арыйан» сахалыы таҥас дефилетигэр, норуодунай суруйааччы Елена Слепцова-Куорсуннаах «Уус уонна итэҕэл» сэһэргэһиитигэр үгүс киһи тоҕуоруһа муһунна. Мандар Уус, тыа сирин киһитин быһыытынан, хас биирдиибитигэр төрөөбүт нэһилиэкпитигэр ыаллыы олорор ытык дьоммутун — кэпсээннээх-ипсээннээх Бүөтүрү, элэккэй Миитэрэйи, уус Ньукулайы санатаргы дылы. Ол да иһин буолуо, дьон-сэргэ Мандар Уус муударай санаатын, олоҕу көрүүтүн  бэйэтигэр чугаһатан олус сэргии ылынар.

https://t.me/sakhasire20/64206

«Үлэ кыбаартала» креативнай кластер хаһан да маннык элбэх киһини мунньубута суоҕа. Ханна эрэ кырыымпа тыаһыыр, бу диэки саха быһаҕын, хомуһун атыыта.  Норуот маастардара  — тимир уонна мас уустара биир этээһи толору ылан, маастар кылаастары ыыттылар.  Уустары кытта көрсүһүүгэ тимир уустарын түмсүүтүн  салайар  Александр Терентьев-Айгын Уус уопсастыбаннай тэрилтэ тэриллиэҕиттэн туох үлэ барбытын иһитиннэрдэ.

https://t.me/sakhasire20/64209

Кэрэхсэбиллээҕэ баар, бу тэрээһиҥҥэ ыччат хото кэлбит. Ити курдук, Мандар Уус үбүлүөйдээх тэрээһинэ норуот бырааһынньыгын быһыытынан бэлиэтэннэ.