Манипулятор уот лииньийэтин тоҕо көттө

Муус устар 26 күнүгэр күнүс 12 чаас саҕана Дьокуускайга «Ремконтора» лииньийэтин манипулятор тиэхиньикэтэ тоҕо көтөн кэбиспит. Онон Бүлүүлүүр аартык 4-5 килэмиэтиригэр, Борисовка-3, Базовай переулокка, Хатыҥ Үрэх шоссетыгар олорор дьон уота суох хааллылар.

12 чаас 28 мүнүүтэҕэ алдьаммыт учаастактан ураты, лииньийэ үлэтин сөргүттүлэр. Толору холбуурга үлэ ыытылла турар.

«Якутскэнерго» киин элэктэриичэскэй ситимнэрин пресс-сулууспата иһитиннэрэринэн, кэнники икки сууккаҕа бу лииньийэни алдьатыы иккис түбэлтэтэ буолар.

Муус устар 25 күнүгэр манипулятор 6 кВ «РП-9-2» лииньийэни алдьатан, Якутская уулуссаҕа анкернай тирэҕи тоҕо көппүтэ. Онон Петр Алексеев, Стадухин, Феликс Кон, Котенко, Асямов, Якутская, Жорницкай, Пионерскай, Семен Данилов, Космонавтар уулуссаларыгар уот барбыта. Биэс чааска Киин РЭС энэргиэтиктэр элэктэриичэстибэ лииньийэтин  чөлүгэр түһэрэн, уоту биэрбиттэрэ.