Маннык көрсүһүүлэр олус наадалаахтар

“Ама,  илгэлээх Ийэ тылбыт иинэр-хатар, төрөөбүт тылбыт үтүрүллэр, сахабыт тыла сарбыллар кэмэ кэлиэ дуо?” — диэн ыйытыы үгүс киһини үүйэ-хаайа тутар олоҕор тиийэн кэлбит эбиппит… Чахчы даҕаны, төрөөбүт тылбыт тула кыһалҕа үөскээн, ааспыт сылга ол тула икки улахан сийиэс буолбута даҕаны элбэҕи этэн эрдэҕэ. Онон,  билигин быыһык кэм дэнэр кэрдиискэ сахалыы тыллаахтар бэйэбит хамсаннахпытына табылларын бириэмэ ирдиирэ билиннэ. Хата, ол туһунан толкуйдуур дьонноох эбиппит диэн махтаныаҕы баҕарыллар.

Уус Алдан улууһун киинэ Бороҕонтон аныгылыы десант диэн тэриллэн, олунньу 10 күнүгэр Бэрт-Ууһун нэһилиэгин Сыырдаах бөһүөлэгэр «Ийэ тыл илгэтэ» диэн төрөөбүт тылбытын харыстыыр, сайыннарар туһунан толкуйу түмэр, кэскиллээҕи торумнуур бастакы көрсүһүүнү тэрийдэ.

Десант кыттыылаахтара:

Троева Клара Николаевна, үөрэх салалтатын методическай салаатын салайааччыта; Павлова Лена Семеновна, улуустааҕы кииннэммит библиотека салайааччыта; Бурцева Наталья Васильевна, В.В.Алексеев аатынан Мүрүтээҕи уолаттар гимназияларын учуутала, филология билимин хандьытаата;  Колодезникова Роза Константиновна, Киин бибилэтиэкэ куйаар ситиминэн үлэни тэрийэр салаатын салайааччыта; Павлова Ольга Николаевна, Киин бибилэтиэкэ кыраайы үөрэтэр салаатын салайааччыта; Гоголева Надежда Васильевна, улуустааҕы оҕо бибилэтиэкэтин, оҕо ийэ тылынан ааҕыытын көҕүлүүр киин үлэһитэ;  Бурцева Светлана Михайловна, улуустааҕы «Кэскил түһэ» ийэ тыл түмсүүтүн салайааччыта;  Оллонов Коля, Г.В Егоров аатынан Мүрү 1 № орто оскуолатын 10-с кылааһын үөрэнээччитэ.

Олохтоох нэһилиэнньэ өттүттэн «Чуораанчык» уһуйаан,  оскуола төрөппүттэрэ, нэһилиэккэ баар тэрилтэлэр үлэһиттэрэ, «Эйэҕэс эбээлэр» түмсүү кыттыылаахтара, олохтоох дьаһалта, дьокутааттар бааллар. Сахалыы тыыннаах оскуолаҕа дириэктэр Марианна Михайловна Петрова, нэһилиэк баһылыга Илья Прокопьевич Ильин үөрэ-көтө көрүстүлэр. Сахалыы таҥныбыт Далбар хотуттар алаадьынан, кымыһынан айах туттулар, эйэҕэстик сэһэргэстилэр. Көрсүһүүнү бу кэскиллээх хамсааһыны көҕүлээччи, десант салайааччыта Клара Николаевна Троева иилээн-саҕалаан ыытта. Кини төрөөбүт тылбыт харыстабылга наадыйар диэн бэлиэтээн, ситэрэн ситимнээн, биир-биир тыл биэрэн истэ. Киэҥ ис хоһоонноох көрсүһүүгэ  өрөспүүбүлүкэҕэ ыытыллыбыт саха тылын, литэрэтиирэтин, култууратын учууталларын 3-с сийиэһин, бибилэтиэкэрдэр бастакы сийиэстэрин туһунан иһитиннэриилэр, айымньынан тургутук, саха тылын дьылҕатын туһунан санаа атастаһыыта, «Күн» оҕолор түмсүүлэрин туһунан билиһиннэрии, сахалыы ааҕыы туруга хайдаҕын дьүүллэһии, удьуору үөрэтии, тылбыт тула үөскээбит кыһалҕа туһунан кэпсэтиилэр, сонуннар иһилиннилэр, ырытыылар оҥоһулуннулар. Олохтоохтор хардары бэйэлэрин олохторугар сыһыары тутан санааларын үллэһиннилэр, кыра саастаах оҕолор нууччалыы саҥарар чахчылара баарын бигэргэттилэр. Киэһэ хойукка диэри буолбут уратылаах көрсүһүү маннык кэпсэтиилэр олус туһалаахтарын, тылбытын харыстааһыҥҥа, сайыннарыыга чопчу ыйыылар-кэрдиилэр,  тэтимнээх хамсаныылар, туһааннаах үлэлэр наадаларын арылхайдык көрдөрдө. Десант үлэтэ салҕаныахтын, бар дьоҥҥо көмө буолуохтун.

Светлана БУРЦЕВА, уопсастыбаннай кэрэспэдьиэн