Маннык көрсүһүүлэртэн ыччат патриотическай санаата күүһүрэр

Ааспыт күннэргэ Кэбээйи улууһун Чагда сэлиэнньэтин баһылыга Айыл Седельников көҕүлээһининэн, байыаннай дьайыыга сылдьар биир дойдулаахтарбыт оскуола оҕолорун кытта көрсүһүүлэрэ буолла.

Айыл Александрович байыаннай дьайыы буола турар сиригэр иккитэ бара сылдьыбыт буолан, уолаттар хайдах балаһыанньаҕа сылдьалларын бэйэтинэн билэр. Маннык көрсүһүүлэртэн ыччат патриотическай санаата күүһүрэрэ, көрүүтэ кэҥиирэ эмиэ чуолкай.

“Юрий Эверстов уонна Ньургун Иустинов быстах хомуурга түбэһэн барбыттара. Көрсүһүүгэ үүнэн иһэр ыччакка буола турар балаһыанньаны кэпсээтилэр, уолаттар армияҕа туох бэлэмнээх бараллара наадатын сүбэлээтилэр. Үгүс ыйытыыларга хоруйдаатылар,  ыччакка баҕа санааларын эттилэр”, — диэн кэпсээтэ “Тускул” култуура киинин уус-уран салайааччыта Альбина Ноговицына.