“Маннык тэрээһиннэргэ киһи сэргэхсийэр, саҥа доҕоттордоноҕун”

Байыаннай дьайыы кыттыылаахтарын күрэхтэһиитигэр сэргэх сирэйдээх-харахтаах киһи баттыктаах иһэрин көрөн тохтоттум. Николай Матвеев остуол тенниһигэр, пауэрлифтиҥҥэ, буулдьанан ытыыга уонна дуобакка кытта кэлбит.

Кини Ньурба улууһуттан төрүттээх, куоракка олорбута ырааппыт. 2023 сыл балаҕан ыйыгар хантараакка илии баттаан барбыт.

“Барыахтаахпын, иэспин толоруохтаахпын диэн толкуй эрдэттэн баар этэ, — диир Николай. — Икки инбэлиит оҕолоохпут, кинилэри атахтарыгар туруорар сорук эмиэ баара. Кэргэммэр эппэккэ хантараакка илии баттаабытым, субу көтөөрү туран биирдэ эппитим”.

Тиийбиттэрин кэннэ полигоҥҥа илдьэн хайдах ыталларын бэрэбиэркэлээбиттэр. Николай сыалы барытын таппытын көрөн снайперга суруйбуттар уонна сарсыныгар Запорожьеҕа Старомайорка штурмовой биригээдэтигэр снайперынан ыытан кэбиспиттэр. Инньэ гынан туох да бэлэмэ суох киһи биир күн буолаат, инники кирбиигэ түбэһэр. “Ньурба” диэн позывнойданар. Биригээдэлэригэр 126 киһи баар, сахалар 28-тар.

“Биллэн турар, артиллерия ытыалааһыныгар аан бастаан түбэһээт, олох сыанатын дьэ билбитим. Ол саҕана дрон наһаа үөдүйбэккэ турар этэ, ордук артиллерия, тааҥка үлэлиирэ. Онно холоотоххо, билигин биир киһиэхэ 5-6, сороҕор уончаҕа тиийэ дрон тигээйи курдук тоҕо анньан кэлэллэр.

Штурмҥа киирэн истэхпитинэ, тааҥканан ыппыттара, оскуолага өттүкпэр кэлэн түспүтэ. Үс күнү быһа бэйэм сыыллан расположениебар тиийбитим биир да киһи суох, бары суох буолбут этилэр. Үс күнү быһа аһаабатах, уу испэтэх, утуйбатах, тыыннаах хаалбыт киһи диэн санаалаах уу көрдөөн, окуопалары кэрийбитим. Үһүс окуопаҕа икки бытыылка ууну булан, ону иһэн киһи-хара буолбутум. Ол олордохпуна, биир киһи сүүрэн иһэр эбит. Ыҥырдым, ону күрүөйэххин дуо диэн ыйытар. Суох, бааһырдым диибин. Онтум баара саха уола эбит, кини миигин быыһаабыта. Москваҕа Бурденко-1 госпитальга сыппытым. Волонтердар Туйаара Николаевналаах наһаа кыһаллан көмөлөспүттэрэ, Улан Удэҕэ, Приморьеҕа Диана эмиэ наһаа көмөлөһөр. Волонтердарга барҕа махталбын тиэрдэбин”.

Николай эмтэнэн дойдутугар олунньу 26 күнүгэр кэлбитэ. Билигин реабилитация бара сылдьар.  Рихард Зоргеҕа баар кииҥҥэ иккитэ сытан тахсыбыт. “Эпэрээссийэм сыыһалаах оҥоһуллубут, кимистибитин көннөрбөтөхтөр, ол иһин аҥар атаҕым кылгас. Эндопротез оҥорторон, атахпын тэҥнэттэхпинэ үчүгэй буолуо”, — диэн инникигэ эрэллээх. Харчытын Оборуона министиэристибэтэ төлүөхтээх эбит.

“Бу маннык тэрээһиннэр буолаллара үчүгэй, киһи сэргэхсийэр, саҥа доҕоттор баар буолаллар. Социальнай өттүнэн барыта этэҥҥэ, туох оҥоһуллуохтааҕа барыта оҥоһулла турар”, — диир Николай.