Маннык ыйытыылаахпын

Бэрт сотору үрдүк уонна орто анал үөрэхтэргэ туттарсыы үгэнэ саҕаланыа турдаҕа. Туттарсааччыларга көдьүүстээх буолуо диэн маннык наадалаах боппуруостарга сөптөөх хоруйдары биэрэбит. 

Эксээмэн түмүгэ суох

Ыйытыы: Биир кэлим эксээмэн (ЕГЭ) түмүгэ биллэ илигинэ үөрэх тэрилтэлэригэр докумуон­нары ыытар көҥүллэнэр дуо?

Хоруй: Көҥүллэнэр. Докумуон туттарарга пааспар, уопсай орто үөрэҕи бүтэрбити туоһулуур аттес­тат уонна СНИЛС (баар түгэнигэр) ирдэнэр.

Сайыҥҥы өттүгэр уһуйааннар үлэлэрэ

Ыйытыы: Сайын куоракка уһу­йааннар тоҕо үлэлээбэттэрий?

Хоруй: Дьокуускай куораттааҕы үөрэх управлениетын начаалынньыгын бирикээһигэр олоҕуран, быйыл сайын дьуһуурунай уһуйааннар үлэлиэхтэрэ. Ол курдук, от ыйыгар уокуруктарынан 12, атырдьах ыйыгар 11 дьуһуурунай уһуйаан үлэлиэҕэ. Толору испииһэги үөрэх управлениетын саайтыгар киирэн көрүөххүтүн сөп.

Түөрт сыл

Ыйытыы: Биир кэлим эксээмэн (ЕГЭ) түмүгүнэн хас сыл туттарсыахха сөбүй?

Хоруй: Бакалавриат уонна специалитет бырагыраамаларыгар үөрэххэ ылалларыгар биир кэлим эксээмэн түмүгэ түөрт сыл билиниллэр. Ол эбэтэр 2019 сылтан бэттэх туттарбыттар түмүктэрэ быйыл хапсар.

Уопсайга киирии

Ыйытыы: Үөрэххэ киирдэххэ уопсайга миэстэни хайдах ылыахха сөбүй?

Хоруй: Устудьуоннар уопсайдарыгар миэстэ бүддьүөт миэстэтигэр киирбит, улуустан сылдьар дьоҥҥо барыларыгар көрүллэр. Бастакы уочаратынан тулаайах оҕолор, төрөппүт көрүүтэ суох хаалбыт оҕолор, оҕо эрдэхтэриттэн инбэ­лиит дьон, 1 уонна 2 бөлөхтөөх ин­­бэлииттэр, РФ сокуонугар олоҕуран чэпчэтиинэн туһанааччылар ылар бырааптаахтар.

Докумуону туттарыы

Ыйытыы: Быйыл докумуону хайдах туталлар? Куоракка барбакка эрэ туттарыахха сөп дуо?

Хоруй: Быйыл абитуриеннар докумуоннарын түөрт көрүҥүнэн туттарыахтарын сөп:

– үөрэх кыһатыгар бэйэлэрэ кэлэн

– абитуриент тус кэбиниэтинэн (личный кабинет) электроннай көрүҥүнэн

– “Поступление в вуз онлайн” супер сервиһи туһанан

– Үөрэххэ ылар хамыыһыйа аадырыһыгар “Арассыыйа буостатын” нөҥүө.

Бигэргэттэрии ирдэммэт

Ыйытыы: Докумуоннарбын нотариуһунан бигэргэтэр ирдэнэр дуо?

Хоруй: Суох, нотариуһунан бигэргэттэрэр ирдэммэт.

Аттестат ыларга

Ыйытыы: Оскуоланы бүтэрбитим туһунан аттес­таты ыларга биир кэлим эк­­сээмэҥҥэ саамай кырата хас баал буо­луохтааҕый?

Хоруй: Орто уопсай үөрэх туһунан аттестаты ыларга икки булгуччулаах эксээмэни (нуучча тыла уонна математика (судургутутуллубут эбэтэр уустугурдуллубут) туттарар ирдэнэр. Маныаха нуучча тылыгар 24 баалтан намыһаҕа суох, математикаҕа 3 сыанаттан аҕыйаҕа суох (судургутутуллубут), 27 баалтан намыһаҕа суоҕу (уустугурдуллубут) ылар ирдэнэр.

Үөрэх докумуонун туттарыы

Ыйытыы: Үрдүк үөрэх тутар хамыыһыйатыгар аттестаты (оригинал) туттарар ирдэнэр дуо?

Хоруй: Үөрэх туһунан докумуону туттарыы үс көрүҥэ баар:

– докумуону тутар хамыыһы­йаҕа тус бэйэҕитинэн

– атын дьонунан нотариһунан дэбиэринэс оҥорторон

– докумуоҥҥутун судаарыстыбаннай өҥө (Госуслуги) сервиһинэн биэрэр буоллаххытына, онно бэйэтигэр аттестаты (оригиналы) туттарабын диэн бэлиэни туруоруоххутун сөп. Оччотугар үөрэх тутар хамыыһыйаҕа хаста да кэлэр ирдэммэт. Бу атын эрэгийиэн үрдүк үөрэҕин кыһаларыгар туттар­сааччыларга ордук табыгастаах.

9-с кылаас кэнниттэн

Ыйытыы: Сиэстэрэ буолуохпун баҕарабын, 9-с кылаас кэнниттэн ханнык үөрэх тэрилтэтигэр кии­­риэхпин сөбүй?

Хоруй: Алданнааҕы мэдиссиинэ кэл­лиэһэ, Нерюнгритааҕы мэдиссиинэ кэл­­лиэһэ, Жатайдааҕы тиэхиньикум 9-с кы­­лаас кэнниттэн үөрэххэ ылаллар. Дьокуускай куораттааҕы мэдиссиинэ кэллиэһигэр 11-с кылаас эрэ кэнниттэн киириэххэ сөп.