Марафон 5 км дистанциятын биэтэгэр Никита Неустроев бастакынан кэллэ!

Быйыл «Тымныы полюһа Өймөкөөн-2026» 7-с кыһыҥҥы экстремальнай марафоҥҥа Өймөкөн аҕыс олохтооҕо кыттыыны ыларын туһунан иһитиннэрэн турабыт.

Бу чааска Өймөкөөн улууһун ситимнэрин үөрүүлээх сонун тилийэ көттө: «Н.М. Заболоцкай-Чысхаан аатынан Томтор орто оскуолатын үөрэнээччилэрэ Никита Неустроев уонна Андрей Кондаков 5 км сүүрүү биэтэгэр бастакынан кэллилэр!». Ол курдук, Никита Неустроев — 1-кы миэстэ, Андрей Кондаков — 2-с миэстэ.

«Өймөкөөҥҥө кыахтаах уоланнар бааллар. Уолаттар аартыгы арыйдылар. Бу биир дойдулаахпыт Семен Баишев тус холобура, кини үлэтин түмүгэ!» — диэн Тымныы полюһун Өймөкөөн дьоно-сэргэтэ оҕолорун уонна кинилэри дьарыктаабыт Семен Баишевы айхаллыыллар.