Матрена Лаврушкина: «Биһиги көмөбүт — эйэлээх олох эргийэрин туһугар!»

Саха сирин дьоно-сэргэтэ байыаннай эпэрээссийэ түргэнник бүтэрин, эйэлээх олох эргийэрин туһугар тус көмөлөрүнэн, кылааттарынан кыайыыны уһанса, чугаһатыһа сылдьаллар. Ол курдук Өлүөхүмэ улууһун Улахан Муҥку нэһилиэгин олохтоохторо бу дьиҥ-чахчы ботуруйуоттуу хамсааһыны күүскэ өйүү, тус көмөлөрүн оҥоро олороллор.

Ол туһунан “Аартык» норуот айымньытын дириэктэрэ Матрена Афанасьевна Лаврушкина бу курдук санаатын үллэһиннэ.

— Биһиги нэһилиэктэн уопсайа алта уолбут байыаннай дьайыыга кытта диэн ыҥырыллан барбыттара. Олортон Айаал Балбахов олунньуга байыаннай дьайыыларга сылдьан олохтон туораабыта. Кинини “Мужество” уордьан наҕаарадатыгар түһэрбиттэрэ кэлэрин күүтэ сылдьабыт. Уолбутун нэһилиэк дьоно бүттүүн мустан, дьонугар туох кыалларынан көмөлөһөн, өйөһөн, харайбыппыт.

Биир уолбут олунньу саҕаланыытыгар Владивостокка госпиталга сытан баран, манна дойдутугар кылгас уоппускаҕа кэлэ сылдьыбыта. Олохтоох дьаһалта бу уолбут элбэх оҕолоох ыал аҕата буоларынан өрөспүүбүлүкэ байаҥкамаатыгар Авдонин аатыгар, борокуратуураҕа ходатайство ыыппыта. Байаҥкамааттан аккаас кэлбитэ. Онуоха уол кэргэнэ Таисия бэйэтэ сүүрэн-көтөн, адвокат наймылаһан, сууттаһан, кэргэнин элбэх оҕолооҕунан байыаннай эппэрээссийэҕэ сулууспаттан төнүннэрбитэ. Ол бириэмэҕэ аҕата хараҕа көрбөт буолан, эмтэнэ барарыгар нэһилиэк дьоно харчы хомуйан көмөлөспүтттэрэ.
Итиэннэ дьиэтигэр кэргэнэ уонна аҕыйах ыйдаах оҕолоох биир уолбут быстах хомуурга сыыһа ыҥырыллан барбыта. Кини Өлүөхүмэ техникумун бастакы кууруһун устудьуона. Онон байыаннай дьайыы сириттэн төттөрү эргиллэн кэлбитэ. Кулун тутар саҥатыгар кэлбитин бары үөрэ-көтө көрсүбүппүтүн тэлэбиидэнньэҕэ устубуттара.
Дьокуускайтан кэргэннэнэн кэлбит биир уолбут улуус байаҥкамаатыттан ыҥырыллан ити уолаттардыын бары бииргэ барбыттара. Бу аҕыйах хонуктааҕыта уолбут уоппускаҕа иһэр диэн үчүгэй сонун кэлбитэ. Кэлэр күнүгэр кэргэнэ Дьокуускайга уол оҕону төрөөн көрсүбүтэ. Онон билигин кини уоппускаҕа сылдьар.

Нэһилиэк Аҕа баһылыга Еремей Иванович Решетников уоппускаҕа кэлэр уолаттарга сахалыы быһах бэлэхтэтэлээбитэ. Нэһилиэк дьаһалтатыттан түүн хараҥаҕа көрөр прибору атыылаһыыга диэн 39 тыһыынча солкуобайдаах көмө харчы көрүллүбүтэ. Урбаанньыт Максим Викторович Габышев байыаннай эпэрээссийэни өйүүр пуондаҕа уонна элбэх оҕолоох буойуммут уоппускатыгар кэлэ сырыттаҕына, бэйэтэ астыыр бородууксуйатыттан көмөтүн тиксэрбитэ. Дьиэ кэргэттэригэр туох көмө наадатынан көмөлөһө олоробут. Эдэр оҕолор уокка оттор мас хайытан, муустарын ылан биэрбиттэрэ, балык түҥэппиттэрэ. Тыа ыала сэмэй буолан, көмө наада дуо диэтэххэ, бэйэбит гынабыт дииллэр. Биирдиилээн дьон улуус волонтердарын штабыгар көмөлөһөр. Соторутааҕыта Кыайыы пуондатыгар Өлүөхүмэ улууһа 600-тэн тахса тыһыынча солкуобайы хомуйан ыытарыгар биһиги нэһилиэкпит бэйэтин сэмэй кылаатын киллэрбитэ. Онон буойуттарбытыгар байыаннай эпэрээссийэҕэ наадалаах квадрокоптеры, уо.д.а. ыларга нэһилиэк дьоно ким төһө кыалларынан харчынан көмөлөһөр.

Уолаттарга дьонноро мантан баһыылка итиэннэ таҥас-сап ыларга диэн харчы ыыталларын Ростовка баар тирэх пуун үлэһиттэрэ сыа-сым курдук тутан барытын толорон-оҥорон тиксэрэллэр. Буойуттарбыт син сотору-сотору сибээскэ тахсаннар, дьоннорун кытта билсэ тураллар.

Дьэ, бу курдук биһиги нэһилиэк дьоно-сэргэтэ байыаннай эпэрээссийэ түргэнник бүтэрин, эйэлээх олох эргийэрин туһугар тус көмөлөрүнэн, кылааттарынан кыайыыны уһанса, чугаһатыһа сылдьаллар.