Маргарита Денисова: «Бэрэсидьиэн норуот итэҕэлин ылла»

РФ, СӨ үтүөлээх учуутала, ССРС үөрэҕириитин туйгуна, «Арассыыйа бастыҥ учуутала» күрэс икки төгүллээх кыайыылааҕа, Дьокуускай куорат 2-с №-дээх Национальнай политехническэй орто оскуолатын учуутала Маргарита Денисова буолан ааспыт быыбар туһунан санаатын үллэстэр.

— Бу чахчы устуоруйаҕа киирэр быыбар буолар уонна дойду сайдыытыгар, аан дойдутааҕы уопсастыба иннигэр улахан суолталаах. Норуот санаатын тиэрдиитэ инникигэ эрэлин, итэҕэлин биллэрэр. Саха сирин ылан көрдөххө, быыбардааччылар хаһааҥҥытааҕар да көхтөөх кыттыыны ыллылар. Онон өрөспүүбүлүкэбит быыбардааччыларын 87%-на дойду сайдарын, бигэ туругун, күүстээх, көдьүүстээх буоларын таллылар.

Хас биирдии киһиэхэ бэрэсидьиэн быыбара бырааһынньык курдук буолла: дьон национальнай таҥастарын кэтэн, оҕолорун илдьэ дьиэ кэргэнинэн, эдэр ыаллар саахса кэнниттэн кэлэн, 100 саастаах ытык кырдьаҕастар, ол иһигэр, мин ийэм, 102 саастаах Иванова Федора Николаевна курдук бэтэрээннэр куоластаатылар, — диэн үтүөлээх учуутал санаатын тиэртэ.

Маргарита Денисова этэринэн, бэрэсидьиэн быыбарыгар Владимир Путин үрдүк көрдөрүүтүгэр Саха сирин, Уһук Илин олохтоохторун кини үлэтин сыаналааһыннара, федеральнай салалта өйөбүлүн билиниилэрэ, Уһук Илиҥҥэ бэрэсидьиэн боломуочуйалаах бэрэстэбиитэлэр Юрий Трутнев хамаандатын, Ил Дархан Айсен Николаев үлэлэрин түмүгэ көһүннэ. Уһук Илин олохтоохторо Владимир Путины талбыт буоллахтарына, уокурук салгыы тэтимнээхтик сайдан иһиэҕэ.

Быйылгы бэрэсидьиэн быыбара Уһук Илин усутуоруйатыгар саамай маассабай буолла — быыбардааччы  73,7% кэлэн куолаһын биэрдэ (2018 сылга – 67,54%). Владимир Путины 86,6%-ра өйөөтө (2018 сылга – 67,78%). Саха сиригэр Владимир Путиҥҥа быыбардааччы   87,79 %-на куоластаата.

Ил Дархан, бырабыыталыстыба дьаһалтатын пресс-сулууспата.