Маргарита Егоровна — орто дойду маанылаах Далбара

Саха сирин сурунаалыыстарын сойууһун бэрэссэдээтэлин солбуйааччы Галина Алексеевна Бочкарева бэрэссээдэтэл быһыытынан үлэлии сылдьан, 2016 сыллаахха норуоттар икки ардыларынааҕы пресс-тууру тэрийбитэ. Ол кэмтэн ылата пресс-туур кыттыылаахтара мэлдьи көрсүһэн, биир идэлээхтэрбит үбүлүөйдэрин ыытыһабыт, өйөһөбүт.

Ол биир туоһутунан, бэҕэһээ Маргарита Егоровна Винокурова 75 сааһын туолбут үбүлүөйүгэр пресс-туур кыттыылаахтара ыалдьыттаатыбыт. Тэрээһин үөрүүлээх чааһын Галина Алексеевна уонна араадьыйа суруналыыһа Альбина Тарабукина иилээн-саҕалаан ыыттылар, араас интэриэһинэй оонньуулары оонньоттулар.

Олортон биирдэстэрэ суруналыыс Ася Иевлева кэргэнэ Михаил Эверстовтыын Маргартиа Егоровна биэс тарбах иһинэн чопчу сыаналанар ураты хаачыстыбатын өй үлэтин сэрэйиитин күүһүнэн чаҕылхайдык ыыттылар. Бастатан туран, ыытааччы пресс-туурдартан саамай элбэхтик аан дойдуну тилийэ айанныыр туристан Юлия Игнатьеваны таайтаран таһааран бэйэтин санаатын ыйыппытыгар, Юлия ааспыт сылга Африкаттан саҕалаан, ааспыт эрэ нэдиэлэҕэ Японияттан кэллэр даҕаны, Маргарита Егоровна турист быһыытынан сири сиксигинэн 75 сааһыгар сылдьыбытын таһынан өссө салгыы кини былаана элбэҕин бигэргэтэн, турист быһыытынан Маргарита Егоровна баһыйарын эттэ.

Сурунаалыстар Георгий Белоусов, Альбина Тарабукина тэлэбиидэнньэ, араадьыйа эйгэтигэр сүрүн исписэлиистэр эрээри, аҕа саастаах табаарыстара Маргарита Егоровна 75 сааһын туоллар да, сытыы бөрүөтэ сыппаабакка, кылааннанан иһэрин эттилэр. Билигин бочуоттаах сынньалаҥҥа да олордор, бары саайтарга, хаһыаттарга, сурунаалларга тиһигин быспакка суруйа сылдьарынан, биир идэлээхтэригэр холобур буоларын эттилэр.

Профессор Виктор Георгиевич Игнатьев наукаҕа ситиһиилэрэ үгүс эрээри, Маргарита Егоровна курдук Мюнхеҥҥа аан дойду таһымнаах кэмпириэнсийэҕэ дакылааты кини курдук ааҕа илигин, онон аҕа саастаах идэлээҕэ научнай эйгэҕэ биир харыс үрдүк турарын эттэ.

Хаһыаттар эрэдээктэрдэринэн, бэчээт эйгэтигэр өр сылларга салайааччы быһыытынан үлэлээбит Галина Алексеевна Маргарита Егоровна курдук атын эйгэҕэ оскуолаҕа дириэктэринэн, нэһилиэк баһылыганан, сельсовет исполкомун бэрэссэдээтэлинэн үлэлээбэтэҕин этэн туран, Маргарита Егоровна салайааччы быһыытынан биир дойдулаахтарыгар үлэлээн ааспытын бэлиэтээтэ.

Хоту дойдуттан төрүттээх суруналыыс, мелодист Владимир Индигирскэй Маргарита Егоровна курдук, хас да хоту улуустарынан олохсуйан үлэлээбэтэҕин, Абый Дружинатыгар төрөөбүтүн, үөрэммит эрэ сылларыгар олорбутунан, хоту дойду төрүт олохтооҕун быһыытынан Маргарита Егоровна ааттанара саамай сөптөөх диэтэ.

Оттон асчыт быһыытынан бэйэтин билсиһиннэрбит Сусанна Никитина, Маргарита Егоровна курдук хаһаайка быһыытынан эдьиийбит баһыйарын, араас аһы күн аайы сиэннэригэр, оҕолоругар, кэргэнигэр араас бүлүүдэни астаан, бөлөхпүтүгэр күн ахсын түһэрэн ыытарынан, хаһаайка быһыытынан тэҥнээҕэ суоҕун ураты тутан кэпсээтэ.

Онон биир идэлээхтэрэ бу хаачыстыбалары үбүлүөй ыалдьыттарыгар Маргарита Егоровнаны сүрүн дьоруой быһыытынан толору арыйдылар. Алгыс уота уһуннук умайан, этиҥ түспүт маһынан, кытыанынан арчыланныбыт. Оһуокай алгыстаах түһүлгэтин төрүттээтибит. Истиҥ санаа этилиннэ, үөрүү өрөгөйө кууста.

Марта Николаева