Марха 1 №-дээх оскуолатын сэтинньигэ тутан бүтэрэр былааннаахтар

Эбии тутуу үлэҕэ киирдэҕинэ, оҕолор биир симиэнэнэн үөрэнэр кыахтаналлар.

Үс мэндиэмэннээх тутуу сүрүн куорпуһу кытары сылаас көрүдүөрүнэн холбонор. Дьокуускай куорат дьаһалтатын пресс-сулууспата иһитиннэрэринэн, саҥа куорпуска химия, биология, физика хосторо былааннаналлар. Маны сэргэ успуорт саалата, 300  миэстэлээх саала, бибилэтиэкэ, остолобуой киирэллэр.

— Биир симиэнэнэн үлэлээтэхпитинэ, оҕолорго да, учууталларга да табыгастаах буолуо. Оҕолор куруһуоктарга, спортивнай дьарыктарга сылдьалларыгар ордук буолуо этэ, — диэн Марха 1 №-дээх оскуолатын дириэктэрэ Мария Стручкова санаатын этэр.

Марха 1 №-дээх оскуолата — Дьокуускайга биир кырдьаҕас оскуоланан буолар. Манна 907 оҕо үөрэнэр. 2024-2025 үөрэх дьылыгар 1  кылааска 115 оҕо киириэхтээх. Оскуолаҕа «Мы туристы», «Музейное дело», «Марха» успуорт кулууба уо.д.а. куруһуоктар, дьарыктар бааллар.

Дьокуускай куорат дьаһалтатын пресс-сулууспата