Марианна Шадрина: “Аны болҕомтону үөрэх хаачыстыбатыгар уурабыт”

Кэлиҥҥи биэс сылга өрөспүүбүлүкэҕэ 269 социальнай эбийиэк тутуллан үлэҕэ киирдэ. Итинтэн 48 тутуу – оскуола. Кэрэхсэбиллээҕэ баар, хоту, Арктика улуустарыгар эмиэ болҕомто ууруллар. Балартан биир холобурунан былырыын үлэҕэ киирбит ыраах Орто Халыма улууһун Алаһыай нэһилиэгин Арҕахтаах сэлиэнньэтин В.А.Местников аатынан Алаһыай орто оскуолата буолар.

Алаһыай сэлиэнньэтигэр үлэлии турбут улахан, типовой оскуола уокка былдьаммытын кэннэ, 2005 сылтан оҕолору, уопсайа, биэс эбийиэгинэн бытанан үөрэппиттэр, үлэлээбиттэр. Олохтоохтор туруорсан, улуус, дьокутааттар үлэлэһэн, 2016 сылтан саҥа оскуола тутуута саҕаламмыт. Генеральнай бэдэрээтчит “Норд Инжиниринг” ХЭУо тутууну болдьоҕун иннинэ бүтэрэн, силигин ситэрэн, оскуола күһүн сэтинньигэ үлэҕэ киирбит.

— Оскуолабыт 80 миэстэлээх, биир этээстээх, уопсайа 2000 кэриҥэ кв.м. иэннээх. 2016 сылтан тутуута саҕаламмыт эбийиэк бырайыага төһө да эргэрдэр, сыана үрдээтэр, бэдэрээтчик күүскэ үлэлэһэн, оскуоланы аныгы ирдэбилгэ эппиэттиир гына хааччыйда. Уруккубутугар холоотоххо, 100 бырыһыан үчүгэй усулуобуйаҕа үөрэнэ, үлэлии олоробут. Ол курдук, кылаастарбыт миэбэллэрин олоччу уларыттылар, остолобуойбут тымнытарыгар (холодильник), ас буһарар оһоҕор, миэбэлигэр тиийэ, үлэ уруогун кэбиниэтэ ирдэнэр тэрилинэн, физика, химия, биология биридимиэттэрин лабаратыарыйалара хааччылыннылар, интерактивнай дуоска, проектор, лингафоннай кэбиниэт, кылаас аайы көмпүүтэр, ноутбук,  барыта баар буолла.

Орто Халыма улууһугар тыа сиригэр аныгы ирдэбилинэн саҥалыы тутуулаах оскуола Берёзовка национальнай оскуолата уонна биһиэхэ эрэ буолар. Оскуола аһыллыытын үөрүүлээх тэрээһинин кыһыҥҥы суол аһыллыбытын, халлаан сылыйа быһыытыйбытын кэннэ бу сыл муус устарыгар тэрийиэхпит диэн былааннаан олоробут.

Күн бүгүн 67 үөрэнээччилээхпит, барыта 35 киһи үлэлиир, итинтэн сүүрбэ иккитэ – педагог. Биллэн турар, вакансиялар бааллар. Бэйэбит кыахпытынан, олохтоох оҕолору, дьону үөрэттэрэргэ, идэлэрин хайысхатын уларыттарарга үлэлэһэбит. Биир үксүн ааспыт сылларга усулуобуйа да суоҕуттан үлэлии кэлбэттэрэ буолуо. Билигин оскуолабыт сырдык, сылаас, бары өттүттэн хааччылынна. 2023-2024 үөрэх дьылыттан  математика, нуучча тылын, технология (уолаттарга) уонна уруһуй биридимиэттэрин учууталларыгар наадыйабыт. Олорор дьиэнэн хааччыйабыт, сибээс баар. Үөрэ-көтө үлэлии кэлиэхтэрэ диэн эрэнэбит, — диэн Алаһыай орто оскуолатын дириэктэрэ Марианна Шадрина кэпсиир.

Кэнники сылларга оҕолорбут үрдүк үөрэххэ киириилэрэ суоҕун да кэриэтэ. Үгүстэрэ орто анал үөрэххэ туттарсаллар, саҥа оскуола үлэҕэ киирэн, аны сүрүн күүспүтүн хаачыстыбаҕа уурабыт диэн дириэктэр түмүктээн этэр.