Марина Бахилина АГАТУ устудьуоннарын кытта көрүстэ

Дьокуускайга Владимир Путин  итэҕэллээх киһитэ  Марина Бахилина АГАТУ устудьуоннарын кытта көрүстэ. Саха сирэ Донецкай Өрөспүүбүлүкэҕэ баар тирэх пуунун волонтера байыастарга көмөлөрүн иһин устудьуоннарга махтанна.

— Оҕолор маладьыастар, фроҥҥа, госпиталларга быһаччы көмөлөһөн, окуопа чүмэчилэрин уонна бородуукталары оҥорон таһааран, ыыталлар. Байыастар төрөөбүт дойдуларыттан тэйэ сылдьан, дьиэтээҕи астарын олус ахталлар. Кинилэр тута төрөөбүт дойдуларын саныы түһэллэр, өрөспүүбүлүкэ кинилэри соҕотохтуу хаалларбатын билэллэр, көмө иһин махтаналлар, — диэн Марина Бахилина эттэ.

Арктикатааҕы агротехнологическай университет устудьуоннара улуустартан кэлэр хааһы үргээн, балык ыраастаан, атын да аһы бэлэмнээн, байыастарга ыыталлар.

— Биһиги «Патриот14» волонтер түмсүүтүгэр сылдьан, өстөөхтөн саһыарар сиэккэлэри өрөбүт, окуопа чүмэчилэрин оҥоробут, оонньуурдары, харысхаллары тигэбит. Мантан да атын тэрээһиннэргэ көхтөөхтүк кыттабыт, тоҕо диэтэр, туора туран хаалыа суохтаахпыт, — диэн устудьуоҥка  Нарияна Попова кэпсээтэ.

Бу көрсүһүүгэ ыччат өйөөһүн, саҥа каадырдары бэлэмнээһин боппуруостарын эмиэ таарыйдылар. Эспиэрдэри, волонтердары кытта көрсүһүүгэ сүүстэн тахса устудьуоннар уонна преподавателлэр кытыннылар. Эдэр дьоҥҥо чугас кыһалҕалары ырытыспыт буолан, устудьуоннар эспиэрдэри сэргээн иһиттилэр, бэйэлэрин ыйытыыларын биэрдилэр.