Марина Бахилина Судаарыстыбаннай баһаарынай сулууспа кэллэктиибин кытары көрүстэ

Саха Өрөспүүбүлүкэтин Судаарыстыбаннай баһаарынай сулууспатын кэллэктиибэ Бэрэсидьиэн Владимир Путин Саха сиригэр итэҕэллээх киһитин Марина Бахилинаны истиҥник көрүстэ.

Көрсүһүүгэ ДНР-га баар өрөспүүбүлүкэ Тирэх пуунун волонтера Марина Бахилина Аҕа дойду буойуннарын дьиэ кэргэннэрин кэмитиэтин Саха сиринээҕи салаатын үлэтин уонна анал байыаннай дьайыы кыттыылаахтарын дьиэ кэргэттэригэр оҥоһуллар араас өрүттээх көмө туһунан кэпсээтэ. Кини баһаары утары охсуһааччыларга дьиэтин уоттан быһаабыттарын иһин махталын биллэрдэ.

«Биирдэ аттынааҕы ыалым дьиэлэрэ умайан, уот мин дьиэм сарайыгар түһэн майан барбыта. Дьиэм буруонан туолбута. Баһаарынайдар тута кэлэннэр, уоту умурораннар, дьиэбит быыһаабыттара. Кэнники билбиппинэн, эһиги кэллиэгэлэргит – Маҥаннааҕы баһаарынай чаас эбит. Миигин быыһаабыт киһи сирэйин уонна саҥатын өйдөөн хаалбыппын: «Докумуоҥҥун ыл уонна дьиэттэн таҕыс», — диэбитэ. Мин эһиги хорсун санааҕытынан киэн туттабын, эһиги эмиэ дойдубут дьоруойдара, биһиги көмүскээччилэрбит буолаҕыт», — диэтэ Марина Бахилина.

Көрсүһүү кыттыылаахтара материальнай-тэхэньиичэскэй өттүнэн урукку сыллартан быдан тупсубутун, баһаарынай салаалар хааччыллыылара сыл аайы тупсарын, аныгы баһаары умуруорар, баһаары эрдэ булар систиэмэлэр оҥоһуллалларын кэпсээтилэр. Дойду салалтатын уонна өрөспүүбүлүкэ өттүттэн улахан болҕомто уурулларын бэлиэтээтилэр.

Санатан эттэххэ, эрдэ РФ Киин быыбардыыр 544 киһини Владимир Путин итэҕэллээх дьонунан бигэргэппитэ. Онно култуура уонна искусство, успуорт, биисинэс, мэдиссиинэ эйгэтин ааттаах-суоллаах бэрэстэбиитэллэрэ киирбиттэрэ. Олор истэригэр актер Сергей Безруков уонна Владимир Машков, режиссер Никита Михалков, дирижер Юрий Башмет, тириэньэр Ирина Винер уо.д.а. Итэҕэллээх дьон статуһун Россия бары регионнарын ытыктабыллаах бэрэстэбиитэллэрэ ылла. Ону таһынан итэҕэллээх дьонунан эрэгийиэннэр биллэр-көстөр дьонноро буолбуттара.