Мария Карпова: промтуризм – Саха сирин туризмын саҥа уонна кэскиллээх хайысхата

Быйыл бырамыысыланнай туризм биир тутаах көрүҥ быһыытынан быһаарылынна, онуоха СӨ Урбааҥҥа, атыыга-эргиэҥҥэ уонна туризмҥа министиэристибэтэ бырайыактары оҥорор.

Бу туһунан Урбааҥҥа, атыыга-эргиэҥҥэ уонна туризмҥа миниистири солбуйааччы Мария Карпова эттэ диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

«Бырамыысыланнай туризм – бу билигин биһиги көрөр хайысхабыт буолар. Биһиги араас хайысхалаах эбийиэктэринэн нус-хас сырыыны тэрийиигэ интэриэстээхпит. Саҥа глэмпиннэргэ дьиэ кэргэн сынньалаҥын тэрийэргэ кыһаллабыт. Биһиги сорукпут – бырамыысыланнай салаа сүрүн суолталааҕын, туристары араас оҥорон таһаарыы үлэтин көрдөрүү буолар», – диэн бэлиэтээтэ Мария Карпова.

Билигин Саха сиригэр бырамыысыланнас туризмынан 10 туристическай маршруту үлэҕэ киллэрии былаана оҥоһулунна. СӨ Урбааҥҥа, атыыга-эргиэҥҥэ уонна туризмҥа министиэристибэтэ уонна СӨ Бырамыысыланнаһын уонна геологиятын министиэристибэтэ кыттыһаннар бөдөҥ бырамыысыланнай тэрилтэлэри кытары үлэлииллэр. Кинилэр сүбэ, методическай көмө өттүнэн, бырамыысыланнай экскурсиялары, пуорумнары, сиэссийэлэри ыытыы боппуруостарыгар көмөлөһөллөр.

Билигин бырайыакка Дьокуускай уонна өрөспүүбүлүкэ 14 оҥорон таһаарар тэрилтэтэ кытта сылдьар.