Лидия Николаева: «Баҕабыт күүһүнэн иистэнэбит»

«Үлэ, иис күрэһэ» өрөспүүбүлүкэтээҕи байыаннай дьайыыга таҥас тигээччилэр күрэстэрэ бүгүн бүтэһик быһаарыылаах күнэ. Бүгүн Мэҥэ Хаҥалас улууһун аатыттан кытта сылдьар «Хотун Төҥүлү» иистэнньэҥнэр түмсүүлэрэ үһүс миэстэ буолбута. Быйыл кинилэр эмиэ күүскэ тэринэн кэлэн, үс күн тура тэбинэн ситиһиилээхтик кытыннылар. Ол туһунан түмсүү салайааччыта Лидия Николаева бу курдук кэпсиир:

— Биһиги Мэҥэ Хаҥалас улууһуттан сылдьабыт, бу төрдүс күрэспит. 2023 сыл атырдьах ыйыттан байыаннай дьайыыга сылдьар уолаттарбытыгар таҥас тигииттэн саҕалаабыппыт. Бастаан Ирина Саввина салайааччылаах «Илии сылааһа» иистэнньэҥнэр түмсүүлэрэ тахсан маастар-кылаас ыыппыттара. Онно Төҥүлү эргин сытар нэһилиэктэртэн, Тараттан, Тумултан, Дьабыылтан, Төхтүртэн, 20-н тахса киһи кэлэн байыаннар таҥаһы тигэргэ үөрэммиттэрэ.

Манна кырдьык көмөлөһүөн баҕалаах дьон уонтан тахса буолан хаалбыппыт. Билигин даҕаны кыахпыт баарынан таҥас тигэн көмөлөһө сылдьабыт. Бастаан «Илии сылааһын» иһинэн баар буоллахпытына, билигин туспа бараммыт, бэйэбит «Хотун Төҥүлү» диэн ааттаммыппыт. Кыргыттарым күн аайы кэлэллэр, кинилэргэ махтаныахпын баҕарабын. 2023 сыл түмүгүнэн, өрөспүүбүлүкэ үрдүнэн саамай элбэх таҥаһы тикпит түмсүү аатын ылбыппыт.  Дьиибэтэ диэн, биһиэхэ биир даҕаны иистэнньэҥ идэлээх киһи суох, бары бэйэбит баҕабыт күүһүнэн иистэнэр дьоммут. Ким эрэ учуутал, ким эрэ буҕаалтыр идэлээх. Саамай тутаах киһибит, биһиэнин эрэ буолбакка, атын улуустар массыыналарын кытары өрөмүөннүүр Дмитрий Апросимов буолар. Бытовой массыыналар наһаа түргэнник алдьаналлар, ону тута оҥорор буолан, биһиги элбэх таҥаһы тигэбит. Онон Дмитрий Александровичка барыбыт аатыттан махтал тылларын тиэрдэбит.

Биһигиттэн байыаннай дьайыыга саҥа барар, уоппускаҕа кэлэн баран төннөр уолаттар таҥнан бараллар. Оттон бу күрэскэ олус күүстээх хамаандалар кэлэн кытыннылар. Манна биһиги куоһурбут диэн, хас да сыллаах үлэбит уопута буолар. Ким тугу тигэрин бары билэллэр уонна оттон ким үчүгэй бэлэмнээх – ол кыайыылаах тахсыа дии саныыбыт.