Марта Николаева өссө биир саҥа кинигэтэ сүрэхтэннэ

СӨ тэлэбидиэнньэтин уонна араадьыйатын туйгуна, суруналыыс, оһуокайдьыт, алгысчыт, Дархан этээччи Марта Тимофеевна Николаева-Сарыалыйа «Оһуокай сайдар, солбук үүнэр» кинигэтин сүрэхтэниитэ муус устар 12 күнүгэр «Сахамедиа» өрөспүүбүлүкэтээҕи пресс-кииҥҥэ  бэрт элбэх киһилээх, сэргэхтик ааста.

Тэрээһини «Саха» НКиХ шеф-эрэдээктэрэ Альбина Тарабукина иилээн-саҕалаан ыытта. Марта Тимофеевна үөрүүтүн үллэстиэн, кинини эҕэрдэлиэн баҕалаах олус элбэх киһи мустубута тута харахха быраҕылынна. Бу күн Дархан этээччилиин өссө биирдэ тоҥолохтон тутуһан, Бэчээт дьиэтин киэҥ саалатыгар оһуохайга кыттыһарга бэлэмнээх кэлбиттэрэ көстөр.
Кинигэ ааптарын бастакынан «Оһуокай» түмсүү салайааччыта, СӨ култууратын үтүөлээх үлэһитэ Александр Данилов ис сүрэҕиттэн эҕэрдэлээтэ, ааптарга уонна уопсастыба чилиэннэригэр махтал тылларын анаата.
Дархан этээччи Марта Николаева Улуу Сибиэрэп төрөөбүт-үөскээбит Сунтаарыттан төрүттээх. Бүгүн кыыстарын өйөөн, СӨ Судаарыстыбаннай Мунньаҕын (Ил Түмэн) дьокутаата Александр Николаев, Сунтаар улууһун баһылыга Анатолий Григорьев, Сунтаар улууһун дьокутааттарын сэбиэтин бэрэссэдээтэлэ Ульяна Попова үтүө-мааны тылларын анаатылар.
Марта Николаева тэттик да, киэҥ ис хоһоонноох да суруйуулара «Саха сирэ» хаһыакка уонна хаһыат сайтыгар тиһигин быспакка бэчээттэнэн, ааҕааччы киэҥ араҥатыгар тиийэллэр. Бу күн «Саха сирэ» хаһыат кылаабынай эрэдээктэрэ Александр Тарасов уонна Анивера Акимова эҕэрдэлээн, Махтал суругу уонна бэлэхтэрин туттардылар.
Ону таһынан Дархан этээччилэр Афанасий Алексеев, Валентин Хорунов, Руф Гаврильев, Розалия Тихонова уо.д.а.ырыалаах-тойуктаах эҕэрдэлэрин анаатылар.
Сарыалыйа эйгэтэ киэҥ, куорат, өрөспүүбүлүкэ уопсастыбаннай олоҕор көхтөөхтүк кыттар. Кини биир санаалаахтара, дьүөгэлэрэ, өрөспүүбүлүкэ суруналыыстарын пресс-турдарын кыттыылаахтара, Саха судаарыстыбаннай университетыгар бииргэ үөрэммит доҕотторо уо.д.а. ыраахтан-чугастан муһуннулар.

Үөрүүлээх тэрээһин Оһуокай киэҥ түһүлгэтинэн түмүктэннэ.

ххх

Кинигэ  «Оһуокай» өрөспүүбүлүкэтээҕи түмсүү 35 сыллаах үбүлүөйүнэн (2022 с) тахсыбыта кэрэхсэбиллээх.
Ааҕааччы киэҥ араҥатыгар ананар кинигэҕэ Үс Хатыҥ оһуокайын кылаан кыайыылаахтара уонна 2022-2023 сылларга Ил Дархан оһуокайга стипендиаттара сырдатыллыбыттар. Марта Николаева бэйэтин уонна «Оһуокай» уопсастыба кыттыылаахтарын,  Дархан этээччилэр, атын хаһыаттар суруналыыстарын суруйуулара бэрт табыгастаахтыҥ таҥыллан, уопсастыба кэккэ сылларын ситиһиилэрэ ааҕааччыга анаан  ахтыллыбыттар. Онон ааптар бу кинигэтигэр «Оһуокай» уопсастыбатын тэриллибит устуоруйатын эрэ буолбакка, оһуокай сахаларга суолтатын, кэнники сылларга болҕомтоҕо ылыллыбыт өрөгөйүн үөрэ-көтө, киэн тутта үллэстибит.

— «Дарханнар» сүбэ мунньахтарыгар 35 сыллаах үбүлүөйбүтүгэр кинигэ таһаарарга быһаарыы ылыммыттар этэ. Ону миигин эппиэттээҕинэн анаабыттарын, хайдах эрэ ыарырҕата санааммын ылсыбатаҕым. Аар Дархан этээччи Семен Черноградскай миигиттэн хас да төгүл туоһулаһан, аҕа табаарыстарым эрэллэрин түһэн биэримээри, биэс сыллааҕы тэрээһиннэрбититтэн сырдатарга соруммутум», -– диэн  Марта Николаева кинигэ үбүлээһинин уйуммут, «Оһуокай» түмсүү салайааччыта Александр Джуровичка махтанна.
Бу кинигэни аахпыт эрэ киһи, ыһыахтарга эрэ буолбакка, «Оһуокай» уопсастыба ыытар тэрээһиннэригэр, күрэхтэригэр кыттыһыан баҕарарын курдук сиһилии кэпсэммит.