Мас бэлэмнээһинигэр субуотунньуктаатылар

Бу аҕыйах хонуктааҕыта Өлөөн улууһун Кирбэй нэһилиэгэр Күөх Маайы уонна Үлэ күнүн уруйдаан, Маайыҥда үтүө сиригэр оттук мас бэлэмнээһинигэр субуотунньук ыытылынна.

Нэһилиэк баһылыга  Владислав Васильевич Николаев көҕүлээһининэн, хамаанданан үлэ гиэнэ күүстээҕэ ааста, кыыстыын-уоллуун хаалсыбакка үлэлээн, былааммытын толордубут.

Субуотунньук кыттыылаахтарыгар шашлык, итии миин, чэй бэлэмнэнэн, араас ас эгэлгэтэ тэлгэнэн, айылҕаҕа мааны остуол тэрилиннэ.

Күргүөмнээх үлэбит күнүн Владислав Васильевич тэрийбит үгэс буолбут хамаанданан күрэхтэһиитэ толорон биэрдэ. Күрэхтэһии түмүгүнэн 3 миэстэни — “Кирбэй” (хапытаан Николаев Л. В.), 2 миэстэни – “Маайында” (хап. Игнатьев В. Ю.),  1 миэстэни — кылаан кыайыылаах “Дьулуур” (хап. Алексеев Т. А.) ыллылар. Кинилэр грамота уонна мэтээл ылан, үөрүү өрөгөйүн туттулар.

Сыал ытыытыгар күрэхтэһиигэ Лена Александрова (үһүс миэстэ), Дора Солдатова (иккис миэстэ) бэркэ ыттылар, бастакы миэстэни ылбыт Леонид Николаевка “Сытыы харах” үрдүк аат иҥэриллэн, мэтээл тутта.

Субуотунньук кыттыылаахтарыгар Кэлимсэ киин үлэһитэ Симонова С. Х. флешмоб үҥкүүлэтэн, олус сэргэхтик түмүктээтибит.

Субуотунньукка көхтөөхтүк кыттыбыт Кэлимсэ киин, Кирбэй кулуубун, бибилэтиэкэтин үлэһиттэригэр, олохтоох дьаһалта тутаах үлэһитигэр Николаев Л. В., кыттыбыт дьоммутугар барҕа махтал буолуохтун!

Онон кирбэйдэр үлэлээн, айылҕалыын алтыһан, дуоһуйа сынньанан тарҕастыбыт.

Сардана Степанова, СӨ Үлэҕэ уонна социальнай сайдыыга министиэристибэтин иһинэн Нэһилиэнньэ социальнай көмүскэлин Өлөөннөөҕү кэлимсэ киинин чөлүгэр түһэриигэ отделениетын сэбиэдиссэйэ