Мас-рестлиҥҥэ норуоттар икки ардыларынааҕы быраабылаларын саҥа эрэдээксийэтэ бэчээттэннэ

Мас-рестлиҥҥэ норуоттар икки ардыларынааҕы быраабылаларын саҥа эрэдээксийэтэ бу сыл олунньу 1 күнүттэн күүһүгэр киирэр.

Дьаһалга Норуоттар икки ардыларынааҕы мас-рестлиҥҥэ Федерациятын Бэрэсидьиэнэ Александр Акимов илии баттаата.
Быраабыла саҥа эрэдээксийэтэ ааспыт сыл ахсынньы ыйыгар норуоттар икки ардыларынааҕы мас-рестлиҥҥэ Федерациятын кэмпириэнсийэтигэр ылыныллыбыта. Туһааннаах дьаһал тохсунньу 28 күнүгэр илии баттанна. Сүрүн уларыйыыларынан саҥа ыйааһыннар категориялара эбилиннилэр, ону кытта судьуйа кэллиэгэйэтин саҥа боломуочуйалара киирдилэр. о.д.а.

Холобур, норуоттар икки ардыларын таһымыгар эр дьоҥҥо 85 кг диэри саҥа ыйааһын категорията эбилиннэ, оттон дьахталларга — 60 уонна 70 кг диэри ыйааһыннар. Саҥа ыйааһыннар эдэрдэргэ, бэтэрээннэргэ баар буоллулар. Аан дойду уонна континент чөмпүйэнээттэрэ уларыйбыт быраабылаларынан ыытыллыахтара. Эр дьон уонна дьахталлар ортолоругар 17 кэмпилиэк наҕараада оонньонуо.

Национальнай федерацияларга олохтоох таһымҥа быраабыланы тарҕатыыны тэрийэргэ сүбэлээтилэр. Ону тэҥэ сэминээрдэр ыытыллыахтара, киллэриллибит быраабылаларынан видеороликтары уһулуохтара.