Хаартыска- Дьулустаан Сергеев. СИА.
Бэҕэһээ, кулун тутар 14 күнүгэр, Нерюнгри оройуона тэриллибитэ 50 сыллаах үбүлүөйүн чэрчитинэн мас тардыһыытыгар улахан спортивнай тэрээһин буолан ааста.
Суолталаах турнирга 15 араас хамаандаттан 40-ча спортсмен кыттыыны ылла. Бириистэрэ ботуччу: муҥутуур кыайыылаахтарга 110 тыһ. солк., үрүҥ көмүс призердарга — 80 тыһ. солк., боруонса призердарга — 60 тыһ. солк.
— Өрөспүүбүлүкэ араас улуустарыттан бары ыйааһыннарга кэриэтэ өрөспүүбүлүкэ сүрүн лиидэрдэрэ кытыннылар. Быйылгы сылтан саҥа быраабылалар киирбиттэрэ. Онон уопуттаах суудьуйалар спортсменнар хамсаныылара ирдэбилгэ төһө эппиэттииллэрин барытын үөрэтэн дьүүллээтилэр. Маннык бириистээх күрэхтэһии ахсааннаах, онон Нерюнгри баһылыгар Роман Щегельнякка тэрээһини дьоһуннаахтык өйөөбүтүгэр махталбытын тиэрдэбит, — диэн күрэхтэһии сүрүн суудьуйата Василий Протопопов бэлиэтээтэ.
Өрөспүүбүлүкэтээҕи турнир кыайыылааҕынан Булуҥ улууһун спортсмена Иван Болтунов буолла. Кини Европа уонна Аан дойду чөмпүйүөннэрин куоһаран бастаан, бэйэтэ да соһуйда уонна үөрдэ.
— Мас тардыһыыга дьарыктаныахпыттан бу бастакы кыайыым. 2013 сылтан куоракка кэлэн баран, бу көрүҥҥэ олохтоохтук дьарыктанабын. Өрүү 2-3-с миэстэлэргэ тиксэрим. Онон бүгүн бастаан тахсан, олус үөрдүм. Кыайыы — бэйэҕэр эрэл түмүгэ. Барытын дьарык быһаарар. Кыратык дьарыгы көтүттүҥ да, куоттараҕын — күүстээхтэн күүстээх кимэн иһэр, — диэн санаатын үллэһиннэ Николай Болтунов.
Дьахталларга 75 киилэ үөһэ ыйааһыҥҥа аааттаах-суоллаах Татьяна Баишева кыайыыны ситистэ. Аан дойду абсолютнай чөмпүйүөнэ титуллаах спортсмен мас тардыһыытынан 10-с сылын дьарыктанар. 12 сааһыттан дьарыктанар буолан, ситиһиитэ сөҕүмэр.
Чэпчэки ыйааһыннаахтар ортолоругар Томпо улууһуттан аан дойду үс төгүллээх чөмпүйүөнэ Ирина Севрюк кыайыылааҕынан таҕыста.
Успуорт миниистирин бастакы солбуйааччы Гаврил Мохначевскай Нерюнгри улууһа мас тардыһааччыларынан аатырар оройуон буоларын бэлиэтээтэ. Ол курдук, аан дойду чөмпүйүөнэ Татьяна Григорь, аан дойду кубогын кыайыылааҕа Михаил Ковалик, легендарнай Николай Колодко ааттара оройуоннарын дорҕоонноохтук ааттаталлар. Ону тэҥэ быйыл сайын Нерюнгри оройуонугар ыытыллар Олонхо Ыһыаҕар мас тардыһыыта биир сүрүн көрүҥүнэн буолуоҕа.
Бүтүн Арассыыйатааҕы мас-рестлинг федерациятын бэрэсидьиэнэ Михаил Гуляев успуорт бу көрүҥэр Саха сирин биир чаҕылхай спортсмена, Арассыыйа үтүөлээх тириэньэрэ Николай Колодко буоларын аҕынна. Инникитин Нерюнгригэ Бүтүн Арассыыйатааҕы мас тардыһыыга күрэхтэһии ыытыллара наадатын, онно күүстээх мас тардыһааччылар кэлиэхтэрин сөп диэн этии киллэрдэ.
— Биһиги Нерюнгри куораппыт үбүлүөйүн чэрчитинэн бэлиэ спортивнай тэрээһин ыытарга сорук туруорбуппут. Мас тардыһыытын көрүҥүн талыы – ылбычча толкуй буолбатах. Нерюнгри оройуонуттан успуорт бу көрүҥэр Саха сирин чиэһин үгүс аатырбыт спотсменнара көмүскээбиттэрэ. Николай Колодко аатын өрөспүүбүлүкэбитигэр билбэт киһи суоҕа буолуо. Ол эрээри, хомойуох иһин, бу көрүҥ биһиги оройуоммутугар умнулла быһыытыйбытын билиниэх тустаахпыт. Онон мас тардыһыытыгар спортивнай албан ааппытын бу күрэхтэһииттэн саҕалаан анаан сөргүтүөхпүт, — диэн бэлиэтээтэ Нерюнгри оройуонун баһылыга Роман Щегельняк
Биһиги, сахалар, киһи аймах суруллубут сокуоннарын таһынан, айыылар уонна иччилэр, ол эбэтэр, айылҕа суруллубатах сокуоннарын…
Мартын Герасимович Сунтаар улууһун Кутана нэһилиэгиттэн төрүттээх. Кини билигин Дьокуускай куоракка бэрт сэргэхтик олорор, быйыл…
Бүгүн, кулун тутар 15 күнүгэр, «Точка будущего» үөрэхтээһин киинин тутуу былаһааккатын көрө Ил Дархан Айсен…
Ханнык баҕарар эмтэнээччи тустаах ыйытыытыгар сөптөөх харданы, көмөнү ылар кыахтаах. Ол эбэтэр кини көннөрү суругун…
Бөрө адьырҕа кыыл буолан, хаһаайыстыбаҕа оҥорор ороскуота элбэх. Саха сирэ киэҥэ бэрт буолан, улуус-улуус араастаан…
Сайыммыт кылгас буолан, сылааһы сөбүлүүр оҕуруот үүнээйилэрин, эрдэ ситэр суортарын рассаданан эрэ олортоххо үчүгэй үүнүүнү…