Маскировочнай сиэккэни баайыыга элбэх киһи кытынна

Бүгүн, Арассыыйа күнүн тэрээһинин чэрчитинэн, Дьокуускай куорат Орджоникидзе болуоссатыгар «Маскировочнай сиэккэ» аахсыйа ыытылла турар. Ким баҕалаах бу аахсыйаҕа кыттыһыан сөп.

Бүгүҥҥү аахсыйаны Дьокуускай куорат дьаһалтата уонна «Саха сирэ эйигин кытары!» холбоһугу кытары бииргэ тэрийбит. Байыаннай дьайыыга сылдьар уолаттарбытыгар анаан оҥоһуллар сиэккэни баайыыга болуоссакка кэлбит киһи барыта да кытынна. Эдэриттэн-эмэниттэн тутулуга суох, бары ис дууһаларыттан кытталларын эттилэр.

Андрей Михайлов, Дьокуускай куорат дьаһалтатын Ыччат бэлиитикэтигэр уонна уопсастыбаннай сибээһи кытары үлэҕэ салалтатын начаалынньыга аахсыйа туһунан санаатын үллэстэр.

— Куорат ыччата түмсэн «маскировочнай сиэккэ» оҥоруохпутун баҕарабыт диэммит «Саха сирэ эйигин кытары!» холбоһукка этии киллэрбиппит. Кинилэр көмөлөрүнэн, сүбэлэринэн аахсыйа бара турар. Бүгүн Арассыыйа күнүгэр бу болуоссакка турда, оттон салгыы байыаннай дьайыы бүтүөр диэри Ярославскай уулуссаҕа баар Ыччат бэлиитикэтин уопсастыбаны кытары үлэҕэ дьиэтигэр маннык сиэккэлэри оҥоруохпут, онон баҕалаах дьон кэлэн кыттаргытыгар ыҥырабыт.

Мария Кудрина, Орто Халыма улууһун Хатыҥнааҕыттан төрүттээх Дьокуускай куорат олохтооҕо:

— Бүгүҥҥү Арассыыйа күнүгэр сөп түбэһиннэрэн тэрийбит, бу аахсыйаларыгар кыттыһан сиэккэ баайыстым. Эрдэ маннык көмөҕө кыттыахпын баҕарар этим, ол гынан баран үлэлиир киһиэхэ ардыгар ол кыаллыбат. Бүгүн, бу болуоссакка аахсыйа буола турарын көрөммүн, кытынным.

Манна туох интэриэстээххиний диир буоллахха, икки быраатым байыаннай дьайыыга кыттыбыттара. Биир быраатым, хомойуох иһин, кыргыһыы хонуутугар суорума суолланан дойдутугар аҕалан иһэллэр. Оттон бииргэ төрөөбүт быраатым уола бастаан бааһыран, госпиталга эмтэнэн тахсан баран, иккиһин кыргыһыыга киирбитэ уонна эмиэ улахан эчэйиини ылан госпиталга сытар. Уолбут госпиталтан таҕыстаҕына этэҥҥэ төттөрү кэлиэ диэн эрэнэбит. Уопсайынан, байыаннай эпэрээссийэ түмүктэнэн, уолаттарбыт, оҕолорбут этэҥҥэ дойдуларыгар кэлэллэригэр, дойдубут үрдүнэн эйэлээх олох сандаарарыгар эрэ баҕарабын.