Маскировочнай ситими баайарга үөрэтэллэр

Бэҕэһээ Дьокуускай куоракка «Боевые шелкопряды Якутии» уопсастыбаннай тэрилтэ байыаннай дьайыыга сылдьар байыастарга анаан маскировочнай ситими баайарга маастар-кылааһы ыытта.

Маннык аһара уустуга суох эрээри сыраны эрэйэр баайыыга Уопсастыбаннай көмө ыстаабын үлэһиттэрэ үөрэннилэр.

«Боевые шелкопряды Якутии» уопсастыбаннай тэрилтэ маскировочнай ситими баайыынан дьарыктанар. Кинилэр 2022 сыл кулун тутар ыйыттан байыастарга көмөлөһөн барбыттара. Бу кэм устатыгар 150 байыаска ситими баайан ыыттылар. Уолаттарбыт маскировочнай ситимнэри сөбүлээн туһаналлар, байыаннай дьайыы сиригэр-уотугар хайдах илдьэ сылдьалларын хаартыскалаан ыыталлар эбит.

Анал таҥаһы уонна ситим лиэнтэтин волонтердар бэйэлэрин харчыларыгар атыылаһаллар. Ол кэннэ сөптөөх гына быһан баран баайыллар.