Масленица үһүс күнэ үүннэ

Масленица — күүтүүлээх саас кэлиитин көрсөр үгэс буолбут бырааһынньыга. Быйыл  бырааһынньык олунньу 16 күнүттэн олунньу 22 күнүгэр  диэри бэлиэтэнэр.

Масленица нэдиэлэтэ саҕаланыаҕыттан хаһаайкалар минньигэс алаадьы буһараллар,  ыалдьыттары көрсөллөр, куораттарга уонна дэриэбинэлэргэ норуот күүлэйэ буолар. Маны сэргэ бырааһынньык хас биирдии күнэ бэйэтэ ааттаах уонна үгэстэрдээх.

Бэлиин — масленица сүрүн аһа, онон бу бырааһынньыгы  бэлиинэтэ суох саныыр уустук. Былыр итии, төгүрүк быһыылаах бурдук ас күнү уонна саас кэлэрин кэрэһилиирэ. Бэлиини Масленица бастакы күнүттэн бырааһынньык бүтүөр диэри буһарыахха сөп. Былыргы итэҕэлинэн, өбүгэлэри ахтан-санаан ааһарга аналлаах бастакы бэлиини дьадаҥыларга биэрэллэрэ эбэтэр ыаллыыларыгар түҥэтэллэрэ. Ол эрээри, аныгы олоххо бу былыргы үгэстэри булгуччу тутуһар ирдэммэт. Сүрүнэ — бырааһынньык тыынынан дуоһуйуу уонна үчүгэй санааны иҥэринии.

Масленица нэдиэлэтин үһүс күнүн «минньигэс ас күнэ» диэн ааттыыллар. Үһүс күн аата нэдиэлэ устата бырааһынньыктааҕы аһылык саҕаланыытын кытта сибээстээх. Бу күҥҥэ остуолга араас элбэх аһы тардаллар — бэлиини эрэ буолбакка, атын да минньигэстэри уураллар. Дьаарбаҥкаларга уонна дьон мустар сирдэригэр итии утах, мүөттээх бэрээнньик, эриэхэ уонна да атын минньигэс аһы амсайар кыах баара.

Бу күн күтүөт уонна ийэ кылын сыһыаннара сүрүн миэстэни ылар. Үгэс быһыытынан, ийэ кылын күтүөтүн ыалдьыттата ыҥырар. Маннык сыһыаннаһыылары кытта сибээстээх хас да итэҕэл баар.