Массыына атыылаһарга туохха болҕомто уурабыт?

Массыына атыылаһыыта олус үөрүүлээх уонна эппиэттээх түгэн. Манна сыыһаны-халтыны оҥорор, үрдэтиллибит сыанаҕа атыылаһар сатаммат. Бүгүн массыына атыылаһааччыларга анаан уопуттаах суоппардартан тэттик сүбэлэри бэлэмнээтибит.

Ханнык баҕарар тырааныспары атыылаһыан иннинэ чинчийэн көрөр, бэрэбиэркэлиир наада.

Эспиэрдэр билигин солуоннары үс көрүҥҥэ араараллар: официальнай, урукку мааркалар дилердара уонна официальнайа суох солуоннар. Официальнай солуоннар Арассыыйа уонна Кытай тимир көлөтүн атыылыыллар. Урукку мааркалар дилердэригэр собуоттан буолбакка, «перекупщиктартан» быһаччы атыыланар тырааныспар турар. Ону сэргэ чааһынай солуоннар тас дойдулартан аҕалан батараллар, холобур, иномаркалар Кытайтан, Кэриэйэттэн, Японияттан эбэтэр Казахстантан киирэллэр.

• Бастакытынан, уопуттаах суоппардар бары солуоннар «отзывтарын» ааҕарга сүбэлииллэр.
• Иккиһинэн, чопчу атыылаһар массыынаҕыт мааркатын эрдэтинэ үөрэтэргит ордук. Ону таһынан массыына кырааскатын, кузовын, мотуорун көрөргө уопуттаах исписэлииһи ыҥырар табыгастаах.
• Үсүһүнэн, солуоҥҥа тест-драйв өҥөнү оҥороллорун көрдөөҥ.
• Төрдүһүнэн, дуогабары болҕомтолоохтук ааҕыҥ. Ордук сүүрэр тырааныспары атыылаһаргыт туһунан пууну сиһилии ааҕыҥ.
• Төрдүһүнэн, солуоҥҥа менеджердэр тырааныспар сыанатыгар бырыһыаны эбэн ылар интэриэстээхтэр, онон болҕомтолоох буолуҥ.
• Бэсиһинэн, атыылааччылар кирэдьиити уонна страховканы солуоҥҥа оҥорорго күһэйэллэр. Ол эрээри, бу сырыыга менеджер солуону кытта үлэлиир эрэ баан өҥөтүн батара сатыыр интэриэстээх. Барытын үөрэтэн, атын бааннар тарыыптарын көрөн баран, дуогабарга илии баттыыр сүбэлэнэр.

Оттон илииттэн, «перекупщиктан» массыына атыылаһарга атын көрүү-истии ыытыллара наада. Ордук туохха болҕомто уурабыт:

1. кузов нүөмэр ПТС докумуоҥҥа суруллубутуттан ураты буолуо суохтаах;
2. массыына төһө өр сүүрбүтүн спидометрга көрөбүт — сылга ортотунан 10 тыһыынча километр тахсыахтаах.
3. кузова бүтүн буоларын көрүҥ;
4. аана, багажнига уонна капота чэпчэкитик арыллыахтаах-сабыллыахтаах;
5. сидиэнньэлэрэ саҥа бүрүөһүннээх буолар түгэнигэр тырааныспар урут улаханнык алдьаммытын туоһулуон сөп;
6. багажник дьэбиҥэ суох буолуохтаах, ыпсары сабыллыахтаах.