Массыына бириис Саха сиригэр хаалла!

Сэбиэскэй Сойуус Дьоруойа Федор Охлопков аатынан «Сулус» полигоҥҥа ыраах дистанцияны ытыыга АФ Сэбилэниилээх Күүстэрин снайпиҥҥа чөмпүйэнээтин үһүс аһаҕас турнира түмүктэннэ.

Турнир РФ бырабыыталыстыбатын бэрэссэдээтэлин солбуйааччыта — Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев салайыытынан ыытыллар.
Тэрээһини УИФУо РФ Бэрэсидьиэнин боломуочуйалаах бэрэстэбиитэлин аппараата, Арассыыйа бойобуой снайпиҥҥа федерацията, СӨ бырабыыталыстыбата, «Буойун» байыаннай-спортивнай бэлэмнэнии уонна патриотическай иитии киинэ тэрийэн ыыттылар.

Күрэхтэһиигэ 124 киһи кытынна, манна байыаннай дьайыы кыттыылаахтара, Оборуона министиэристибэтин, силовой структуралар үлэһиттэрэ, көннөрү гражданскай дьон бэйэлэрин кыахтарын тургутан көрдүлэр.

Онон икки күннээх тыҥааһыннаах киирсии түмүгүнэн күнүскү ытыыга любитель ытааччыларга кыайыылаахтарынан Эбээн Бытантайтан төрүттээх Михаил Ефимов уонна Бүлүү Хампатыттан төрүттээх Леонид Архангельскай 2000 м иккис ытыынан ылан, бастакы миэстэни ыллылар. Массыына бириис Саха сиригэр хаалла!