Массыына ыытар быраабы атыылаһаары бэрик биэрэ сатаабыт

Чурапчы улууһун олохтооҕо массыына ыытар быраабы эксээмэн туттарбакка эрэ ылар туһуттан бэрик биэрэ сатаабыт. Бу туһунан Силиэстийэлиир кэмитиэт пресс-сулууспата иһитиннэрэр.

Чурапчы оройуонун Силиэстийэлиир управлениета 32 саастаах киһиэхэ Арассыыйа Федерациятын 291 ыст. 3 ч. уонна 30 ыст. 3 ч.  бэрик биэрэ сатаабытын иһин холуобунай дьыаланы тэрийбит. Холуобунай дьыала матырыйаалларыгар көстөрүнэн, ааспыт сыл сэтинньитигэр буруйданааччы «В» уонна «В1» категорияҕа массыына ыытар быраабы ылар туһуттан интэриниэт ситимин нөҥүө билбэт киһитигэр, быраабы араҥаччылыыр уорганнарга үлэлиир киһи дии санаан сибээскэ тахсыбыт.

Кини харчы бэрик биэрэн туран суоппар быраабын эксээмэнэ суох ылар туһунан кэпсэтэ сатаабыт. Маннык сыаллаах-соруктаах буруйданааччы бэйэтин тус дааннайдарын, хаартыскатын уонна харчытын аҥаарын ыыппыт. Сотору кэминэн докумуону ылыа суоҕун өйдөөн харчытын сороҕун ыыппатах.

Силиэстийэ түмүгэр буруйданааччы дьайыыта барыта дакаастаммыт. Онон дьыала салгыы суукка ыытыллыбыт.